Arunachal sorkar tasenba agientsü akok: SC

New Delhi, Feb. 22 (Agencies): Arunachal Pradesh nung taoba chief minister Nabam Tuki anema noktaker Congress lennir Kalikho Pul-i chief minister inyaktsü tenangzükba agia sorkar tasen ka tenteta liaka, Hombarnü Supreme Court-i sorkar tasenba agientsüa akok ta olen ka shiogo.
Arunachal Angh-i assembly session mapang atsüzüka agibaji pa nem tashi agüja aliba alia inyakba mapa ka liasü ta tatem nung oshidang agütsüra, sorkar tasen tenteta alibaji agientsü, ta Supreme Court-i metetdaktsü.
Justice pungu- J S Khehar, Dipak Misra, Madan B Lokur, P C Ghose aser N V Ramana nunger adenba constitution bench-i ashiba agi, sorkar tenteta aliba ka anentsütsü asoshi court dak tashi lir.
Arunachal nung taoba chief minister Nabam Tuki atema okatsürtemi, Kalikho Pul-i ozüng alema Arunachal nung chief minister 9 buba inyaktsü atema tenangzükba agi ta ken o benokba angadangdang constitution bench-i iba telangzüba agütsü.
Angh-i January 14, 2016 nü agitsü aliba assembly session December 16, 2015 nü agitsü telemtetba agibaji ozüngi memelaba aser pa nem tashi agüja aliba alia inyakba mapa ka lir ta oshidang agütsüra, December 16, 2015 sülen inyakba mapatem ajak agientsü, ta Supreme Court-i advocate Fali S Nariman aser advocate Kapil Sibal na dang ashi.