Arunachal sorkari BJP nem ali agütsütsü merangba anema noktaker

Itanagar, Aami (June) 29 (Agencies): Arunachal Pradesh sorkari Indira Gandhi Park nung kimung ka BJP state unit office yanglutsü atema agütsütsü merangba Arunachal Civil Society-i aitsüogo.
Sorkari public li nungi 4000 square metres tashi agitsü merangba atema süoki ika bilemer, ta NGO ACS-i metetdaktsü.
State sorkari tim masüba maparen ajanga parnok political party tenüng nung public kimung aser kiojentem agitsü meranger. Anungji, public meyong kimung nung takoksa majurutsü atema district administration-i temelaba magütsütsü ayongzüker, ta Arunachal Civil Society-isa ashi.
Iba kimung ya Itanagar Club kübok lir aser parnokia okadak iba inyakyim anema ken o ka benoktsü, ta ACS-isa shisem.
“Centre nung BJP-i sorkar kiojentem kümzüktsü ayutsü atema inyaker, saka tennis court nung ali agitsü merangbaji BJP indang political manifesto anema lir. Talisa, iba aliji lungkak aitba sentongtem, rally tem ayonga agitsü atema lemzükja lir aser iba anasa aliba Arunachal Press Club-ia tarutsü nung tawa nüngdaktsü” ta parnokisa metetdaktsü.