AS Roma coach asütsü Claudio Ranieri shimogo

Metsüremi/March 9, 2019 (Agencies): AC Roma puri Hokolbarnü Claudio Ranieri parnok coach asütsü asoshi shimba sangdongogo. Pa hopta ka tejakdang Premier League club Fulham puri mapa nungi anentsüba sülen tang Roma-i aniokogo. Fulham nung pa ita asem inyaka liasü.
Ranieri-i Eusebio Di Francesco melentsü, shibai Brehostibarnü Champions League nung parnoki Porto makokba sülen mapa dokja liasü.
“Ni kidangi tanaben meyipa arutsü kanga jangradema bilemer,” ta Ranieri-i ashi.
“Roma puri nü dangi call süra ma ta ashitsüji tamakoktsü lir,” ta paisa ashi.
Arishi küm 67 tain Ranieri ya Rome nung aso aser 1973 küm pa asaya tenzükba aser 2009 nungi 2011 tashi coach ka ama inyaka aliba club-i tang meyipa aruogo.
Roma pur tang Serie A nung jenjang pongububa nung lir aser Champions League nung asayatsü atema point asem dang nüngdaker.
Parnoki asaya karbo kanga junga asayaogo, saka ponglanglen aliba club SPAL, Udinese aser Bologna nungeri akokba ajanga jenjang mejungi aküm.
Ranieri asoshi tang tashi nung takok tulutibaji pa lenisüba kübok 2016 küm Leicester City puri Premier League akokba ya asütsü, ajisüaka pa iba sülen taruba küm February ita mapa nungi anenja liasü.
“Tang ama tensa ka nungbo club metetba, angatetba aser oshi jembitetba coach ka nungdaker, aser Claudio-i item ajak abensatsür,” ta Roma President Jim Pallotta-i ashi.
1987 küm Campania Puteolana team coach süa tenzükba sülen Ranieri-i club terana dak tema nung coach mapa inyakogo.
Club tem rongnung Italian club Juventus, Napoli, Cagliari, Fiorentina, Parma aser Inter Milan, English club Fulham, Chelsea aser Leicester City, Spain club Atletico Madrid aser Valencia aser Ligue 1 sides AS Monaco aser Nantes nunger densema lir. Iba den külemi pai Greece national team coach mapa dena inyakogo.