ASA golden jubilee asayamung Mongulbarnü tenzüktsü

Kohima, February 26 (TYO) : Angami Sports Association (ASA) golden jubilee asayamung February 28 nungi March 4, 2017 tashi Khuochiezie (Kohima Local Ground) aser Indoor Stadium, Officers Hill, Kohima moaputem nung asayatsü.
February 28 anepdang 9:00 akok nung Lok Sabha MP Neiphiu Rio-i iba sentong lapoktsütsü. Pai Old MLA Hostel compound, Phoolbari, Kohima nung golden jubilee nüngolong lapoktsütsü aser iba sülen Kohima Local Ground nung sentong lapoktsütsü.
Golden jubilee asayamung lapokba sentong nung ASA general secretary Er. Zale Neikha menden asütsü. ASA Tir Viliehu Nguzhii-i Tir osang sangoktsütsü aser ASA naklu ken Methaneilie Jiitakhrie-i atentsü.
NCRC Nagaland nung Tir Rev. Dr. Neikedozo Paphino-i sentong tenzüka sarasademtsü aser ASA athletic secretary Khriesamhalie Santsu-i asayartem tenangzükba agidaktsütsü.
Sentong lapokba sülen jui (au nung jajaba) tokteptsü aser asemtepba alitsü.
Asemtepba aser field events tem den ki telung saisapongtem March 1 tashi asayatsü.
March 2 nü Marathon asemteptsü aser iba sentong anepdang 6:00 ako nung chief patron, Vilelie Khamo-i Kohima Science College, Jotsoma nungi tenzüktsüba sülen Kohima Local Ground nung tembangtsü.
Football, volleyball aser ki telung nung asayaba saisapongtem March 2 nungi 3 tashi asayatsü.
March 4 anepdang 9:30 ako nungi Kohima Local Ground nung melangteptsü aser iba sülen benjong tenzüktsü.
Melangtepnü Minister Kiyanilie Peseyie tongti tesemdanger asütsü aser MLA Dr. Neikiesalie (Nicky) Kire tetushi tejaoker asütsü. Iba nü chief patron ji Class I contractor Vilelie Khamo asütsü.
Parliamentary secretary tem Er. Vikho-o Yhoshii, Khriehu Liezietsu, MLAs Er. Kropol Vitsu, Zhaleo Rio aser Dr. Neiphrezo Kedistu nungera tenüng teta jaoker rongnung dena lir.
Sentong lapokba nung shilem agitsüpur ajak den asayamung ketdangsertem, ASA nung tesüiba mapang takok angurtem aser telen shia nungi shilem agitsüpur ajak February 27 nikongtsütsü Kohima Local Ground nung rehearsal agidak arua adentsü ASA general secretary Er. Zale Neikha-i iba sangdong ajanga mepeishia metetdaktsür.