ASA hon jubilee Feb 14 nungi 18 tashi amungtsü

Kohima, January 30 (Agencies): Angami Sports Association (ASA) hon Jubilee benjongmung February 14 nungi 18 tashi Kohima nung amungtsü.
Iba asayamung ASA kübok lokti pezü; NASA, SASA, WASA aser CSA nungi asayar meyirjang dak tali arua shilem agitsü. Tetoktepba yamai alitsü: athletics (tetsür aser tebur), Badminton (tetsür aser tebur) Table Tennis (tetsür aser tebur) Sepak Takraw (tetsür aser tebur) Volleyball (tetsür aser tebur), Football (tebur), au nung jajaba aser Naga nunger melangtepba(tebur).
Asaya balala nung takok angur nem sen lakh 10 dak tema senpet agütsütsü, ta ASA saisapong zülur Mhalelhou Mere-i osangbenertem den jembidang ashi.
Iba asayamung Kohima Local ground aser Indoor stadium nung asayatsü.
Taoba chief minister aser tang Nagaland nungi Lok Sabha nung MP Neiphiu Rio-i 9:00 ako nung Old MLA complex anasa aliba Jubilee nüngshi long lapoktsütsü, aser iba sülen anosa 9:30 nung Kohima local ground nung asayamung tetenzük sentong lapoktsütsü. Sentong temli nungi Athletics balala asaya tenzüktsü.
February 15, 16 aser 17 nung local ground aser Indoor stadium nung tetsür aser teburtem tetoktepba balala asayatsü. Item anogotem nung anogo shia Angami nunger MLA balala tongti tesemdanger alitsü.
February 18 nü Naga nunger melangtepba asaya aser sentong nung Kiyanilie Peseyie, Minister for Social Welfare and Parliamentary Affairs tongti tesemdanger asütsü. Nikongdang sentong nung Dr. Nicky Kire, Minister for Forest, environment and Climate Change, tetushi tesemdanger asütsü.
Marathon asemtepba nung Science College, Jotsoma nungi tenzüka PHQ Junction-TCP Gate-Razhii Point-Tin Patti-DBS-BSF Check gate-Seikhazou-Kitsubozou ta asema arur Kohima Local ground nung tembangtsü.