Asangurtem telok tenteter rarateper

Yakonung September 23 aonung Kohima nung asangur telok ana tsüngda züktepba lendong nung nisung ka asüba osangji asenok ajak asoshi taoksatsü osang ka lir. Atangji, alima asünungji raratepba aser züktepbaji kecha balaka meimlaba osang tasen ka masü. Ajisüaka, asangur telok-telok tentetter züktepba mapaji shisabolutsüka lir. Küm ka ana tejakdang, Dimapur nunga school nung azünger tebur chanutem telok tentetter tangar school den rara mena mesoba otsü liasü. Iba amaji rarateptsü asoshi telok tentetter school o school na mesüra telok o telok na rarateptsü sentong yanglubaji asen lima nung sobaliba tasen ka lir. Tanur asünungji, parnoki tasütsüa metsübur aser tepuokdaki aitsüa kecha arendaka mali. Item rogotem jagi rarateptsü dang jangrar. Iba ama mapang nung tanurtem rogoji tsürabur aser tesayurtem sayutsüngi o aser sarasadem kanga nüngdaktsü. Tang ajungbena asangur chanurtem telok telok kümer raratepbaji shibai sayur aser kong nungi angazük ta bushia odangra, parnok dangji taintemi mesüra tsüraburtemi Korea nunger  film bener arua sayuba nungi tenzükba asütsüa akok. Korea nungertem nungi asenok tangazüktsü aika lir saka ano Korea nung sobaliba tamajung  aika lir, iba jagi Korea nunger kibong aser taküm aika raksar. Aji oda, Korea nunger nüngtugu actress aser actor-tem dena pei khuret makok peisasa suseta asüba otsütem asenoki angashitsü. Asenok aikati Korea film reprangdanger asütsü. Parnok film-ji kanga talang aser takar tulur chirnurtemi anir parnok azüngdak medemertem telok tentetter kati ka mezüngmeshia amshiba otsü kata meliibo Korea film-ji matemtsü. Tanurtem dang masü saka asenok tsüraburtema kodang Korea film reprang tenzükdir, kidang alir ajak amadoker ghonda ana asem film matem tashi ki mapa dena meinyaki reprangteper. Iba ama tangar bendanger film sapua reprangba ajanga kibong nung memeteti aser meteta timtem aser takoksa ajuruba otsütem angashir. Tanü tanurtem telok telok tentetter yimdong nung aonung raratep tenzükbaji Korea nunger film nung school tanurtem telok telok kümer kati ka mezüngmeshia rara menaba noksa nungi angazükba sobaliba tasen ka asütsü. Iba ama sobaliba yabo tuluka küma maodang anendaktsütsüla. Asenok tsüraburtem, tesayurtem aser taintem asoshi tekümdangtsü mapa kaji tanurtemi inyakba mapatem teimbaka  parnok tenük agi angubatem jilu ajizüka inyaker. Aji oda, tanur ka asoshi tangazüktsü lenmang aisü lir. Parnok narong agi angashiba, parnok teni agi menemtetba, parnok temeli agi menakdangba aser parnok teka agi kongshiba ajanga parnok taküm piyong benshia aotsü nüngdaktem  angazüker. Ajisüaka, item dakji alaka tanurtemi parnok tenük agi anguba nungi teimba aser tajungba angazüker. Iba jagi, tanurtem teimbakati asenok tsürabur aser taintemi ashiba mangar, kechiyong asenoki parnok nem agütsüba sayutsüngi o aser asenok taküm libaliro na meputeper. Tanü asenok kibong aser taküm nung tesasatsübaji aji lir. Tanübo alima nung benshiba aser atalokba ajak tv nungsa mereprangaka mobile phone nung arur asünungji, tanurtem dang itemji reprangang aser itemji tereprang, itemji chiang aser itemji techi ta ashitsü kangabo nüngdak madoker, kechiyong parnokji aseni alener meyutettsüsa alima inogo. Iba ama putu mapang ka nung asenoki tanurtem dang shitak aser tai benteta angatetdaktsütsü aser asen taküm libaliro ajanga parnok asoshi asen takümji tatishitsü tajung ka küma alitsübaji kanga tongtibang kümogo. Tanurtemji teti asen den malitsü anungji parnokji kongi odir aser kong lidir, tajung aser tamajung bendangteta litettsüsa parnok taküm renemtsütsübaji kanga tongtibang lir. Item nüngdakji angateta asenoki tanurtem tekolok aser shisatsü merenemtsüra, parnok rongnung kar raratepa senzür, kar mojing külemer aser karbo pongmang lima nung alir ama alitsü. Tang Kohima nung atalokba lendong nung adenertemji tsürabur shiai pei chir ama bilemtsüla aser iba amaji joko asen lima nung mataloktsüsa tsüraburtemi pei chinurtem sarasadema sayutettsüla aser tanurtemji bushia bener arua arogo nung shilem agidaktsütsüla.