Asaram ken o atema Centre-i state 3 nem tetuyuba agütsü

New Delhi, Rongchii (April) 24 (Agencies): Rasemnü (Bodbar) Jodhpur okadak nung Hindu nunger tamangba lennir Asaram indang ken o atema obendang agütsütsü lir aser iba dak sendakba nung Centre-i tanü Rajasthan, Gujarat aser Haryana dang security akangshitsü aser sepai talila mapa lemzüktsütsü atema tetuyuba agütsüogo.
Asaram ya tashiyim agi tetsür dak shi nung medemba ken o ka nung tai tonglokja lir aser tanü Home Ministry-i state asem dang security akangshitsü aser obendang agütsüba sülen lendong kecha matalokdaktsütsü atema azüoktsü tuyuogo.
Rajasthan, Gujarat aser Haryana nung Asaram sülen anidaker aika lir.
Iba atema Rajasthan nungbo tesem aika nung Section 144 alitsü ozüng agütsüogo.
Rajasthan High Court tetuyuba sülen anidaka trial court-i Jodhpur Central Jail nung dang oshidang agütsütsü.
“Obendang anogo atema onoki teinyaktsü ajak inyakogo. Magistrate den court staff, Asaram aser külemi tai tonglokja alirtem, defence aser prosecution counsels ajak tepuokdak alitsü” ta DIG, Jail, Vikram Singh-i osangbener dang ashi.
Rongchii (April) 21 nungi Section 144 ozüng alitsü agütsüogo aser ibaji Rongchii 30 tashi alitsü, ta paisa ashi.
“Onoki yimti nung Rongchii 21 nungi CrPC nung arrla 144 alitsü benokogo aser ibaji Rongchii 30 tashi alitsü. Iba denji külemi onoki yimti nung Asaram indang ashram ajak nung tenük yokdar aser hotel, guest house, bus aser railway station ajak mita reprangdar” ta DCP (East) Aman Deep Singh-ia ashi.
Pei sasa tsüngrem nisung ta ajasang Asaram ya küm 9 tashi tetsür tanur ka dak tashiyim mapa inyakba atema tai tonglokja lir. Iba ken o nung pa aitsüra, küm 10 tashi tepuokdak ayutsü. Gujurat nunga kasa ken o ka nung pa dak tai tonglokja lir.
Jodhpur Police-i Luroi (August) 3, 2013 nü Asaram apu. Iba mapang nungi pa tepuokdak ayuba mechiok. Pai bail temepishiba aiben agütsü saka okadak kati danga magizük.
2013 küm Surat nung aliba tetsür kati Asaram anema ken o benok. Ahmedabad yimti tezülen Asaram’er ashram nung la 1997 aser 2006 tsüngda liasü aser idangji pai la dak tashiyim mapa inyak ta tetsürlai tai tongloktsü.
Tetsürlaji Uttar Pradesh kübok Shahjahanpur nung alir aser la ya ashram nung kaketshir ka liasü.
Yimpoksüi (November) 6, 2013 nü police-i Asaram aser külemi tai tongloktsür nisung pezü- Shiva, Shilpi, Sharad aser Prakash anema chargesheet ka benok. POSCO Act, Juvenile Justice Act aser IPC kübok arrla balala kübok parnok aitsü.
Metsüremi (March) 19, 2017 nungi district and session court nung iba ken o angadangtsü tenzüka liasü.