Asaram ken o nung kuliser ka kahset

Bareilly, July 12 (Agencies): Pei sasa Tzüngrem nisung ta ajasang, Asaram Bapu-i tetsür dak tashiyim mapa inyakba ken o nung pa anema kuli agütsür ka Shahjahanpur district nung mejangjaba nisung kari kahsetogo.
Tang atalokba ya densemabo iba ken o nung kuliser nisung teku anema inyakogo aser nisung anabo süogo.
Hokolbar aonung arishi küm 35 Kripal Singh ji shishilembaba tesem ka nungi kidangi shilangba mapang Shahjahanpur, Puyawan tesem nung motorbike ka nung nisung ana arur pa dak injang kahloktsü, ta tanü police-i ashi.
Mejangjaba nisung anaji jena maodang Asaram anema kuli agütsüba asoshi Singh amokmerena liasü.
Iba sülen Singh ji Shahjahanpur nungi Bareilly nung aliba hospital kati anir oa teyari tagitak nung ayaterm 23:25 ako meta asü, ta Bareilly Circle Officer Mukul Dwivedi-i ashi.
Singh tasümangji arongtsü asoshi Shahjahanpur-i bener ogo, ta paisa ashi.
Additional City Magistrate den jembiba mapang Singh-i, Asaram den sentaktepa alir nisung kari tesüiba anogo ishika pa amokmerena arur, ta ashi.
Police-i ashiba agi, Singh ya transport company ka nung inyaker aser company kibur jala kati 2013 küm Rajasthan, Jodhpur anasa arishi küm 74 Asaram-i la dak tim masüba benshiba anema lai ken o benoka liasü.
Iba ken o nung tongti kuliserji Singh liasü, aser Singh-i ita asem tejaklen kuli agüja liasü.
2013 September ita Jodhpur nung aliba jail ka nung Asaram puoka lir.
Taküm January ita nunga Uttar Pradesh, Muzaffarnagar nung Asaram’er sorochioker ka kahsetogo.