Asaya tenzükogo

Nagaland nung NDPP aser BJP nati aniba  government tenzüker küm ka ajungba den külemi yimten nung asaya tenzükogo. Atangji, Naga nunger memesük yimten nung taoba küm ka tashi zak ta masü yimten telok shia nung lenirtem ajak pei telok metoktsüi ajemajema süidaktsüogo. Ajisüaka, tang tesüiba anogo ishika tsüngda NPP tatar ana NDPP nung adenba den ano NPF tatar teneti dena NDPP-i aniba PDA sorkar junger ta metetdaktsüba jagi Nagaland nung yimsüsürtem akhi asaya asayatsü tenzüker asütsü. Alemli nungi yimten yimsüsür asütsüba ya, tashi aser maongka liaka, kanga tasak, kechiyong nübodok onsara, aiener mesütsü aser jangkudoker (nübortem) ajak aküpasüngtsü. Iba khuretji meteta dang asen tsüraburtemi yimten yimsüsüba nung tatar menden alangzük aser maka agi takar kümer pei taküm, kibong aser yimten aküm meraksadaktsüi yimsüsüa aru. Tanü asen putu nung asenok yimten yimsüsürtem tangatetba jenjang reprangdangra asen tsüraburtem den medemdangtsüla masü asenokbo yimten nung nüktapangtartem ama kümogo. Atangji, yimten yimsüsüba menden alangtsüba ya akhi mapang nungi temela masü, jenjang tasak, anungji takar aser temerangertemi dang tebu koka tatar menden alangzüktet. Tanüa kasaji yimten yimsüsür akümtsü atema election nung toktepba maparen ya tezüba masü. Asenoki aika jembiyonga tanü putu nung sensakerbo yimsüsür mekümtettsü, kechiyong election nung vote maliyonga aser ochimashi mapa meinyakyonga senotsü aotsüsa nüngdak aika adoker. Ajisüaka, asen lima nung election nung sen endokba yabo kecha dena medemdangtsüla masü onsara tali tapong endoker. Ibayongji, election nung tokteper ajak, tadoker aser madoker ta mali, sentsü aika tsüloker aser aika taküm aser kibong dena raksaba angur. Tanü putu tasenba nung tamashi mapa ajak rongnung tulutibaji asenoki election mapang vote ayokba aser vote aliba ajanga asen lima aser asen tarutsü jenjang raksaba ya asütsü. Iba ama election nung sentsü tsüa yur kodaser küm ka junga opposition nung mentettsü ? Opposition nung masü, Ruling nung asüyonga nübortem meyong senotsü angati chikujunga aluzüktsüsa menden ka matara, tanü putu nung election nung adokyonga tebilemtsü tulu lir. Ajisüaka, yimten nungbo takoksa ajuruyonga pei angatetba nung indangindanga nokdaktsüla. Tsüraburi jembiba ama, yimten nung kenü pokbobang aser kenü tenembang ta melenteptsü. Ibaji meteta pokbobang asüdang tamakok aser makamait tia aremtsüla aser tenembang asüdanga asüküma asen kija agitsü bendentsü memerangtsüla. Alima nung aluli tuli aiben asütsü, tsünglu arutsü aser anü aputsü, ajisüaka yimten nungbo yimsüsür ka ama pei tangatetba nung akangakanga nokdakbatetka maka. Iba jagiang alimaia aser senmangertemia asen maliyonga ali ama teti nümadanga bilemtsü aser asen taküm agi mesüliwa tatishitsü tajung küma jembitsü. Asenoki kaketreju nung akhidang chuba aser yimsüsürtem indang otsü azünger, iba kasaji tanü asen lima nunga kaketrejutem nung tanurtem nem asen yimsüsürtem otsü züngdaktsüdi asünunga, shiba otsüang komaka züngdaktsütsü ta shisabolua bilemer.Tangar tashitemetettertemi ashiba agi, nisung ka jakla shitakba metettsü asoshi pa mesüra la nem yimten tashi agütsüdangtsüla. Aji shitaka ta asütsüsa asenok Naga nungertemi yimten tashi amshia pei kija agitsü bilema inyakba aser yimten telok ka nunga indangindanga küm pongoa menokdaktetba jakla agi sayuadokogo. Nisung arishibo tatsüka dang saka pa mesüra la tenüngbo alima mesama tashi alir. Iba amaji tajung süli tamajung süli nisung ka otsüji alima nung taküm alirtemi jembir. Tang Nagaland nung by election aser Parliamentary election agitsüba maparen nung tatalokbatem ya tesüngmangtsüka lir. Iba yagi shinga majangzüktsü saka lia aodang yimten telok ajak akoksatsü aser Nagaland tesensakba akümtsü.