Asayar kati nubur yaritsu lenmang sadema lir : S.Chuba Longkumer

Mokokchung, September 23 :- Saisapong meimba nisungji kanga dang tekümdang aser pa takümji takok nguteta litetba nisung ka asür, saka asaya memeimba taküm kaji teraksatsü mela-melar ta tanu Veterinary & Animal Husbandary Parliamentary Secretary, S. Chuba Longkümeri Intermingle Club Mokokchung tenteter Küm 25 ajungba “Rise as one” omen nung ajemdaker akaba sentong nung jembidang ashi.
S.Chuba Longkümerisa saisapong ya liro asem(3) lir aser itemji jaklaliro, yimyaliro aser mulungliro ta lir, anungji asayar ka dak item liro asemya kodang keta lidir tabensaba asayar ka kümtet ta ashi. Paisa asayar shibaisa tila küma asaya nung shilem agidir item asayartem jagi dang sentsüwangshi takok korangji ngutettsü ta shisem.
Asayar shiai asayar kaji alima meyong ta angateta asayatsüla kechiaser asayar kaji mela mela-a dang nüngtoko akümer aser mela mela-a dang takar kümteter aser pai nüburtem yaritsü asoshi lenmang sadem sadema lir ta S.Chuba Longkümerisa ashi.
Saisapong ajanga alima nung yimjung bener arutsü asoshi lenmang sadema lir, tanü alima ajunga alirtem nüngdak aika dang lir saka item ajak rongnung tongtipangtibaji yimjung ya lir, yimjung ya rongsen agi malizüktettsü saka yimjungji asen dak keta alinung yimjungji asen dak nungi adokdaktsütsüla ta ashi.
Parliamentary Secretary-isa 2015, August 3 anogo India sorkar(GOI) aser NSCN-IM tsüngda Peace Accord ka yangluogo, iba peace accord ya Naga lima asoshi kanga dang nüngdakba yimjung maparen ka lir, anungji iba maparen ya Naga nunger ajaki nungittsüla, Naga nunger Legislature-temji iba maparen asoshi tongtepratepa inyaker (Facilitator) ka dang lir, anungji Naga nunger kija aser lokti ajaki sema yariteptsü kanga dang nüngdaker ta adenshia aliba telok ayongzüka ashi.
Nagaland Chief Minister T.R.Zeliang ya kin tila ka nungi dang süaka pa ya Tsüngremi mapang tetemsü nung Naga nunger anitsü asoshi shimtetba lenir ka lir, kechiaser Naga lima nung kodanga matalokba Opposition melii sorkar bener aor. T.R.Zeliang ya Politics nung kanga dang mongin, pai Naga nunger tia kanga dang junga meteta lir aser pa kanga dang tila akümba nisung aser pa ajak den kasa dang litetba taküm ka lir, aji asünung pa mapang nungsa iba ama peace accord maparen inyaktsüsa akümdang iba maparen takok angutsü asoshi Naga nunger senso ajaki nungitdi ta Parliamentary Secretary S.Chuba Longkümeri tesentepertem ayongzüka jembi.
Tanu iba sentong nung Veterinary & Animal Husbandary Parliamentary Secretary S.Chuba Longkümeri Intermingle Club Mokokchung tenteter Küm 25 ajungba nüngtem kaket (souvenir) sayatsü aser sentong nungsa ward lenir aser Club lenir balalai shilem agia jembia iba jubilee sentong kanga dang longso longsoa takok ngua agia liasü.