Asean-i North Korea dang international-i tuyuba angatsü ashi

Manila, April 30 (Agencies) : Association of Southeast Asian Nations (Asean) nung lenirtemi North Korea dang international-i tuyuba teinyaktsütem shishia agitsü ashi aser Pyongyang-i mid-range ballistic missiles tendangba atema-a ola adok.
Linük ter (10) — Brunei, Cambodia, Indonesia, Laos, Malaysia, Myanmar, Philippines, Singapore, Thailand aser Vietnam — lenirtem Honibarnü 30buba annual summit aser retreat sentong kaogo, ta osangbenertemi ashi.
Philippine Tir, Rodrigo Duterte-i tan Asean senden mener külen Deobarnü nü sangdong ka metetdaktsüogo.
“Onoki Korea peninsula tebilemtsü rasaa jembiogo aser iba tesem nung DPRK-i 2016 küm submarine-launched ballistic missile aser ballistic missile technology amshia nuclear ana tashi tendangba dena tang tatalokdak tensa agi kanga shisabuludaktsür,” ta Asean lenirtemi senden temer külen sangdong ka ajanga metetdaktsü.
“Onoki North Korea dang tangsa tang international temzüng ozüng alema inyakba aser UN Security Council temzüngi ashi mangaba anentsü shiogo,” ta lenirtemi ashi.
Parnok lenir ter jagi, Korea Peninsula nung nuclear amshiba anendaktsüba nung nungittsü aser linük ana tsüngda yimjung alitsü asoshi inyaktsü, ta ashi.
“North Korea-i pei sasa tashi azüoka tesem nung security, yimjung aser tesünep bener arutsü kanga ajungshia metetdaktsür,” ta lenirtemisa ashi.
Asean telok ya tenteter taküm küm 50buba ajunger.