Asean lenirtem senden Manila akar

April 29, 2017 nü Pasay City, Philippines nung  30buba Association of Southeast Asian Nations (ASEAN) senden lapokba sentong nung Southeast Asia lenirtem teka amteper tangokba noksa yangi angur. Lenirtem Honibarnü nungi adenshia küm 50 tain, Association of Southeast Asian Nations (Asean)-i alima nung tebilemetsütem jenti adokba mapang ka nung kechi inyaktsü iba tsütsü tebilemba rasaa jembiteptsü tebilemba nung adenshi. 

Manila, April 29 (Agencies) : Southeast Asia nung lenirtem Honibarnü nungi adenshia küm 50 tain, Association of Southeast Asian Nations (Asean)-i alima nung tebilemetsütem jenti adokba mapang ka nung kechi inyaktsü iba tsütsü tebilemba rasaa jembiteptsü.
“Mendenpurtemi anir nüburtem taküm nung temelenshi bener arutsütsü asoshi Association of Southeast Asian Nations (Asean) tejangraba metetdaktsütsü asoshi tanü adenshiogo,” ta Philippine Tir, Rodrigo Duterte-i iba senden tenzükba mezüng sentong nung ashi.
Asean nung züngsema aliba linüktemji Brunei, Cambodia, Indonesia, Laos, Malaysia, Myanmar, Philippines, Singapore, Thailand aser Vietnam lir, ta osang ajanga ashi.
30buba Asean senden ajunga nung Duterte meden asütsü aser Honibarnü lenir 10 kija senden amendanga paisa anitsü.
Benshia aruba aser tang nungi tasen benoka benshiba security inyakyimtem ajanga Asean-i yimjung, security aser yimji yimjung asoshi inyakba tendanger, ta Duterte-i ashi.
“Linüktem nung rongsenkettsüng tebilemtsütem aser terenlok tapu balala ajanga arok nükjidong nung tebilemtsü adoker,” ta paisa ashi.
Pai, Asean ya temesepba mozü nungi nüji telok ka asütsüla, ta kanga süoki ia ashi.
Asean lenirtem tang ya tesem aser international tebilemtsütem tsütsü tebilemba lemsatepdar. Parnoki maritime security, nüburtem asoshi bilemba telok yangertsü, tesem nung yimjung bener arutsü aser tanaben yimji yimjung bener arutsü asoshi olemtep mapang agi.
Iba senden tatemi Duterte-i menden melepzüng o jembitsü.