ASEAN lenirtemi külemi lungjemer kiralongrar anema raratsüla: Razak

Kuala Lumpur, November 21 (Agencies): Association of Southeast Asian Nations (ASEAN) lenirtemi külemi lungjemer jihadist kiralongrartem anema raratsü tajungshiba olen ka Malaysia Ato Kilonser, Najib Razak-i tanü Honibar nü metetdaktsüogo.

Malaysia kübok Kuala Lumpur yimti nung amenba 27 buba ASEAN senden tenzükba sentong nung o jembidang Razak-i iba olenji sangoktsü.

Islam tamangba yimsü nung ajemdaker alima tesem balala nung kiralongratsü lendong atalokdaktsüba jihadist kiralongrartemi tawa France aser Mali na nung lendong kanga sashia atalokdaktsüba sülen alima lenirtemi tang  kiralongrar den sentakba tebilemtsü khuret tulu benoka lir.

“IS densema, Jihadist kiralongrartem indang tesayuba ya tiyazü tesayuba aser tangatetba ta alima dang jungkai adoka sayutsüla kechiyong parnoki inyakbaji Islam tamangba yimsüi magizükba tesayuba lir,” ta Razak-i ashi.

“Muslim nunger temeshi kaket, Quran nung tamangba yimsü nung ajemdaker kiralongratsü tesayuba agüja mali. Quran-i kechisarena ajunga timtesü inyaktsü sayur aser kiralongraba ya timtesü shilem nung mezüngoker,” ta Muslim nüburtem madak yimsü asüsang, Razak-i tanü metetdaktsü.

“Muslim nunger nisung million 240, Budhhist million 140, Christan million 130 aser tamangba yimsü tanga benshir nisung million jenti alidak, ASEAN region ya sobaliba aser yimtenren meyoktepa aliba tongti tesem ka lir,” ta shia, 1967 küm tentetba sülen ASEAN lenirtemi tanü ASEAN region nung yimji yimjung tia lidaktsüba kuli aliba olen ka paisa tanü metetdaktsü.

Ano külen, “ASEAN Economic Community (AEC) mapatong takok ngudaktsütsü asoshi United States-i ASEAN nung züngsemba linüktem den külemi lungjemer nungdakba maparen inyaktsü renema  lir,” ta US Tir, Barack Obama-ia tanü senden nung metetdaktsüogo.