Asean linüktem nungi lenir ajak R-Day sentong nung adentsü

New Delhi, Aenjeti (January) 10 (Agencies): India aser southeast Asain bloc tesendaktep yanglur küm 25 ajungba nüngtem nung Asean linük 10 nungi lenirtem ajak tetushi tejaokertem ama India nunger Republic Day benjungmong nung adentsü, ta osang jangjaogo.
Bodhbarnü New Delhi nung osangbenertem den jembidang, External Affairs Ministry nung Secretary East, Preeti Saran-i, India nunger Republic Day parade nung tetushi tejaoker 10 adentsü, ta metetdaktsü.
“Tanbo asenok rongnung Asean lenirtem parnok 10 adentsü. Asean lenir parnok 10 prongla iba summit nung adentsü ta parnoki metetdaktsüogo, iba den külemi Republic Day nung parnok tetushi tejaokertem asütsü,” ta Saran-isa ashi.
Lai ashiba agi, iba küm ya Asean aser India atema tongtibang küm ka lir, kechiyong ana tsüngda küm 25 tesendaktep, küm 15 summit partnership aser küm 5 strategic partnership ajungba küm lir.
Laisa, January 25, 2018 nü summit alitsü lia sorkari tongti sentong 16 ayongzüka akatsü.
January 24, 2018 anogo nungi tenzüka Indonesia, Singapore, Philippines, Malaysia, Brunei, Thailand, Cambodia, Laos, Myanmar aser Vietnam lenirtem India tonga arutsü. Linük Tir, Ramnath Kovind-i chiyung benjung ka ayongzüka iba summit tenzüktsü, iba sülen senden amentsü aser tesüsa Ato kilonser, Narendra Modi-i chiyung benjung ka ayongzüktsü, ta metetdaktsü.
Saran-isa, lenir 10 nungi tajemba agi parnok 6 indang kinüngtsü/kinüngbutem atema-a balaka achaayanga renemtsüdar.