ASEAN senden nung adentsü asoshi Obama-i Malaysia tonga ogo

Kuala Lumpur, November 20 (Agencies): Association of Southeast Asian Nations (ASEAN) senden nung shilem agitsü nükjidong nung US Tir, Barack Obama-i Malaysia tanü Hokolbar nü tonga ogo.

ASEAN nung züngsemba linük 10 aser Obama densema, tanüngba alima lenirtemi tan senden nung lushi den sentakba mangatettep ken o, rongsenren aser kiralongrartem den sentakba onük balala benoka jembitsü sentong lir.

Taoba hopta France kübok Paris yimti nung lendong tesashi atalokdaktsüba kiralongrar telok, Islamic State (IS)-i amokmerena aliba yong Malaysia yimtiba, Kuala Lumpur nung ASEAN senden amenba jakdang mitkartem tali kümdangshia aliba osanga jangjaogo.

Tan ASEAN senden nung shilem agir timbaka tawa Philippines nung ayongba Asia-Pacific Economic Cooperation (APEC) senden nung shilem agirtem alisü.

Obama-i tanü Kuala Lumpur yimti tonga aoba sülen idakji tentetba town hall nung ayongba Young Southeast Asian Leaders Initiative (YSEALI) senden nung shilem agia liasü.

“Ni Malaysia Ato Kilonser, Najib Razak den ajurutepdang nübur temeten anema inyakba aser ozüng alema ochimashi inyakba onüktem benoktsü sentong lir,” ta shia, tanü senden nung shilem agirtemi kechisarena ajunga nung talitabong meinyaktsü asoshi Obama-i ajungshi.

Ano külen, par lenisang, Obama-i tan ASEAN senden nung China aser kidangsüa aliba linüktem na tsüngda adokba South China Sea mangatettep ken o den sentakba onüka benoktsü renemba osang ka White House-i tanü metetdaktsüogo.