New Delhi, May 24 (Agencies) : Linük senso shia tebilemba asadangba mapang asemsü lemer anasüi Modi-i aniba sorkar agi temulung asür ta ngutetogo.
Iba asadangba nung nisung 15,000-i shilem agi aser iba mapang parnoki tasüngdangba tem nung vote agütsü.
Iba asadangba nung adener nisung noklang nung shilem 64-i Modi-i aniba sorkari nükjidong tonga inyaktetogo ta ashi aser tanüngba shilem 36-i meinyaktet ta ashi.
Iba asadangba mapang tongtibang onüktemji tetsürtem aser tanur kümzüka ayuba den oset nung sen jenjang atuba sota ayuba tem liasü.
Asadangba nung shilem agirtemi Swachh Bharat aser Make in India inyakyim kübok Modi-i nüburtem angutsü tim ajak nisung shia nem indang indanga parnok accout-i yokba mapa agi kanga temulung süa liasü. Tadener rongnung shilem 76-i tarutsü nung linük nüburtem jenjang tand dang nungi ano tajungba akümtsü tamang kaa bilemer.
Ano anünga aliba küm asem nung Modi sorkari investments aser mapa tasen adokdaktsütsüla ta shilem agirtemi ashiba iba osang agütsürtemi metetdaktsü.
Asadangertemi, “Noklang nung shilem 72-i linük nung terenlok lir ta ashi ajisüaka shilem 20-i terenlok mali ta ashir,” ta metetdaktsü.
Iba asadangba sentong nung India tesem balala nung aliba nüburtem den India nunger bendanglen alirtem dena liasü. Iba sentong ita ka shi agiba mapang olemtep aser vote 20 ben agitep.
Iba sentong nung yimtsüng nungi tenzüker yimti tulu nung aliba nüburtem ajak shilem agidaktsü.
Kasa asadangba nung nisung noklang nung shilem 35-i mapa mangu alirtem nguogo ta ashi ajisüaka shilem 43-i yamaji masü ta ashir. Ano shilem 38-i osettem jenjang aluogo ta bilemer saka shilem 55-i jenjang talila ang tuogo ta ashi.
Tasadangertemi, “Parnok tadener noklang nung shilem 38-i tetsür dak tashiyim inyakba mapa ajema kümogo ta ashi ajisüaka shilem 44-i yamaji masü ta shiogo,” ta ashi.
Kasa osang ajanga ashiba agi, iba asadangba nung shilem agir nisung noklang nung shilem 34-i Modi sorkari Pakistan den tesentaktep tajungba küma yangluogo ta ashir ajisüaka noklang nung shilem 51-i iba tsütsü kecha temelenshi manguba ashi.
Ano noklang nung shilem 68-i NDA sorkari parnoki nangzükba tongtsüdar ta bilemer saka shilem 26-i tenangzükba metongtsüteter ta ashiba kasa osang ajangasa shisem.
You must be logged in to post a comment Login