Asen Ao oshi ya shisadangdi

~ A.Maong Aier Retd G/T Alongmen Ward, Mkg.

Asen oshi ya nüngja khar nungbo kanga dang tongmelang aser sensaker. Itemji khar tangar oshi den medemdanga yamai sayur.
1. Engraji nungbo rong tulu dang SHIP ta ajar aser tong tila dang BOAT ta ajar. Saka asen oshi nungbo rong tulu aser tila ta dang ajar.
2. Engraji nungbo ayong temdanga lenmang yangluba dang BRIDGE ta ajar aser kisüdang nisung sozütsü atema yangluba dang LADDER ta ajar. Saka asen oshi nungbo item ajak dang APU ta dang ajar.
3. Engraji nungbo MOON nungi MONTH ta meyipzükba yong 12 months mesüra monthly salary ta atoktet. Saka asen oshi nungbo item ajakji ITA ta dang amshir.
4. Engraji nungbo home-house-building-hut-hall-quarter-tent-church-temple-mosque-fort-stadium-inn, etc, ta nüngja bendanga amshir. Saka asenokbo item ajak dang ki ta dang ajar. Tetezü azü ki, longki, merangki etc
Asen oshi khar nungbo kanga dang tabensa, tetezü nükjidong ka agi kasa iba nükjidong amshia oren aika yanglutetba tatishi ana agiteta sayur,
Engraji nung SLEEPING/LYING ta asüba ya asen oshi nung oren aika adoker. Itemji yamai; mejanger-mepidaker-longdaker-songlar-judaker-merepdaker-mojudaker-mesangdaker-mangadaker-südaka alir-ondaker-mükadaker-metaloker.
Ano tanga kaji tebang, temeli aser tepu ajanga mapa inyakbatem. Engraji nung eating, chewing, kiss, taste etc. ta asüba ya asen oshi nung aiakasa lir; chiyonger-ajemer-ayonger-achir-mejaker-metepshir-moaker-meseper-menaker-aloshir-meyoker-züoker-mejushir-anemer-mereper-mangumer-aposhir-few asür-ola adokdaktsür-mokor-saktsür-nguzüker-wamesar-tangu sashir-münüloktsür aser chiyongtsütemji kechi ama tebendang aji metetdaktsür.
Tasembuba nung nüngja khar nung teratettsü aser ashishiteptsü aliba ni yamai lemsateper. Tir yimyim Rongchii 2 aser 3 adok nung Wb R. Imkong Lkr 4th Mile Diphupar Dimapur onük nung TSÜREMSETA aser SHISALIOK, item ojang ana nung nüngja ratet lemsatepnüa züngshia ni angatetba ka yamai yaritepdanger.
Nüngja ratet dang meratatsü atema tamasa tatishitsü 3 sayur. Nüngja tejen ka ratetnüdang khar nung iba olong aser olasü meindoker. Tatishitsü MONGZÜ; asür kilem ma nung ozü ka monga dang yimzüba agi mongzü ta jatet. Nüngja khar ratetdang koda masü nung iba olongji tera melenshir. Tatishitsü; TESAYUR, TASAH (idea) sayur, TESAYUR ta asü nung olasüji majungba agi tesayur ta melen südi ta rateter. Nüngja ratetdang olasü melen shiba. Tatishitsü TSÜPOH. Tzü puhdener ayu ama asüba agi iba nung tzü nungi tzüü ta olasüji ajungketa adoker. Iba amaji TZÜREMSETA süngdong talak nungi alileni ajizüka yokra, tsütsü ama tsübua asen mulungjangji remshia (remketa) atur ama asüba agi iba olong ya lanua nungi (nia junglir) asü nung yamaji dang angazüka aru. Mongseneria yamaji dang jembir. TSÜREMSETA. Iba olong nung pai nüngja ratet kanga junga abensaa khuli agütsüogo. Ni iba olong ya pa ajanga angashi anungji paa medentsür. süra iba nungi asen oshi takar ta dang temdi.
SHISALIOK: Iba olong nungi ojang 3 adoker. SHI-SA-LIOK; shi tetezü shir (angazüker), sa tetezü sayuba, liok; iba nungi teratet khuli 3 arur. Mezüngbubaji LI tetezü alima nung alirtem nem shisatsü okdena yutsüba. Tanabubaji yamai, shisatsüji sen agi malir, dokan nunga mayoker, saka shisa bushidang nursery nungi MA/MSc etc tashi zünga aodang sen aser rongsen aika indoker. Anungji sen agi mali yonga indokba agi ali ama ratet asü? Tasembubaji asenoki tsük tu mezüng semki nung sener wahnu sepdoktsü aser ano tanaben senshir per nung inoker, jang temeja tu moluk mesüra likhu nung lioktsü. Iba amaji asen kolok nung shisa lioka yutsüba ta ka rateter. Anungji shia aru ama khuli asem rong nung kabosa terated shitak südi sü?
Nübur kari tajungtiba meteta lira küna yariangma.
Kü onük tatem nung ano maneni olong tejen 2 nung yamai lemsateper. NINOK/LINOK, anaprongla nung nüngja ratet tabensa sayur. Anungji asen osep nung kuba olong inoker ni memetet. Saka ni bilem nung shirnoki linok ta jembir parnoki linok ta dang jembitsü, aser shirnoki Ninok ta jembir parnokia Ninok ta dang jembitsü. Anungji iba nungi asen oshi takar tabensa ta dang südima. Taoba küm nübur ajaki SEMZÜK ta mesüi meshiteta lapok ta asü nung tajungba ta paper osang ajanga lemsatep. Saka nübur ka anadi mulungba dang amshia semzüktsü ta tang züngshir.
Asen osep nungji SEMZÜK ta inoka aliyonga nüburi mumulungba olong süra iba oshiji kodanga merenloktsü ta tekümdangtsü o khar shia kü onük tempanger.