Asen Aotsür tenüngtem ya khen shisadangdi

– A.I. Maong Aier Rtd. G/T, Alongmen Ward Mkg.

Asen meimchir tenüngtem ya mezüng yongi Tsüngremi agütsüba lir. Nisung shia tenüng ka-ka jatetja aliba ajanga ni, na, pa aser la tsüngda tebendang sayur. Asen tenüngtem ya asen oshi ojang asem-pezü meyokteper adokba lir. Asen Aotsür Aortem tenüng ya, asen kin anüdok aser anüdoklen tip alirtemi kanga sapua jatsüdagi. Parnoki asen oshi ya angazüktsü kanga jangrar aser oshi ajungba ama tenüngjia sapur. Anungji tenüng jatsüdang ajaki tenüng narokümji shitak amshitsüla aser tenüng ratetjia kanga junga meteta alitsüla.
Asen tenüng ya orrlem ozüng nung mejangja oren tatsütsü ka-ka amshia jatsüa lir. Tat: Meyilepzük mesüra Imtikümzük etc. Tet: Meyi ka lepzükbaji kechi lepzükba? mesüra Imtikümzük ta asü nung yimtiji kechi nungi kümzükba? Iba jagi mejangja oren (incomplete sentence) ta ajar. Tali rajemtsü atema tejangja oren (complete sentence) Tat: Alokbai tongpang ter tashi nung rara dang arrür kolak meyi kashi lepzük. Sobangbai par yimer ajak arrür nungi/ayawara nungi/kitsük kirong nungi tashitak wara tulu nungi kümzük. Akhi mapang arrür kolak lepzükba mesüra yimtiji arrür nungi kümzükba ajanga tenüng naroküm yamaji jatsüa aru.
Asen oshi mesamatsü aser sobaliba meraksatsü atema asen tenüng ya takok tashi asen oshi nung jatsüa lir. Ano aikadi bendanger tenüng tesadang ka asen oshi tesadang ka ta meyokteper tenüng ka adoka jatsüa lir. Ibajia kanga majung. Asen oshi tajung yur bendanger tenüng tang aikadi jatsüra lia liabo asen sobaliba tera kabo samatsü ta tsübua bilemer adi.
Tebur tenüng tetenzük nung “Naro” ta sür tenzüka aliba Tat: Narotoshi, Naroienba etc… item ya mamshitsüla. Ni mezüng ashi ama iba olongjisa mamshiyonga asen narokümji agir magima lir.
Asen Aortem tenüng ya chichimashi aika jatsüa lir. Ya majung ta ashir masü, saka chichimashi jatsüa ali ama tenüng ratetjia shitak metettsüla. Tat: Toshimeren/Merentoshi, Chubatemsü/Temsüchuba, Chubamangyang/Mangyangchuba. Toshimeren Tet: ajaki toshia meren merena aliba, Merentoshi Tet: merenmerena toshia aliba, Chubatemsü Tet: pa chuba kümer temsütemsüa aliba, mesüra pa chuba mendenibo metutet saka chuba asütsü tetemsü nübu ka liasü ta oren jagi sayur. Temsüchuba tet: pa temsüa aliba agi chuba mendeni tutetba, Chubamangyang tet: par chuba tu tsükchir kari tepsetba agi pai mang ayangba , Mangyangchuba Tet: mangyanger ang ano pa chuba mendeni tutetba. akhi alemli asen lima nung chuba yimli mali asü aser tanga mali. Saka nokinketer, taleptatsünger, Süchir aser putu menden nung tazüngtemji chuba ama lia aruba agi itemji adishia tenüng yamaji jatsüa aru ta angateter.
Kibong kar nungbo apuani tanüng ajunga nüngjem mesüra tesadang ka nüngjem lir: Tat. Alemkaba, Alemkala, Bendangienla, Bendangmeren itemjibo tia agi ajurushiji kecha masü. Saka ni shinübaji kibong ka nung tsürabur mesüra chirnur tenüng tesadang ka nüngjem aliba ajanga par kibong nung jatepjaradang aiben timtem alur. Aji dang masü ano kinünger aser kiyonger kidangera timtem agütsür.
Nisung tenüng kar nung olasü mesüktepa aika lir. Ta: Mangyangtemjen/Mayangtemjen, Chubamangyang/Chubamayang, Temjenmangyang/Temjenmayang, Mangyangtemsü/Mayangtemsü, Mangyangnaro/Mayangnaro etc.. Tebang agi jembidangbo Mangtemjen mesüra Chubamangyang ta angashi saka zülu nungbo Mayangtemjen aser Chubamayang ta ang angu. Mangyang tetezü mang ayangba, Mayang tetezü Mongsen oshi. Iba ya Chungli oshi nung süra tejaklen. Item mesüktepba tenüngtem ya tebang agi jembiba aser zülu nung meputepba ajanga certificate nung timtem aliba aika angashir. Ano ni Govt. High School Mkg nung azüngdang high school principal ji MANGYANGNOKCHA liasü. Pa tenüng ya kaket aika nung Mangyangnokcha ta lir. Saka tanü Mangyangnokcha asü Mayangnokcha?
Akhi mapang oboula Tongpok kinüngtsü tenüng Elongshi Jamilar aser ano otsüla nunger ka tenüng Etiben ta angashi. Ni dena tenüng tang yamaji angashi. Ano ni memetetba khar alitsü akok. Tet: dena tenüng dak alaka asen Aotsür tenüng ajak ‘la’ agi atem mesüra ‘naro’ ta agi atemba tang liasü. Iba amaji tebur aser tetsür tenüng bendangteta dang aru. Saka tanü asüng atsü-apong tenüng tebendang mali tenüng tesadang tang jatsüba angashir. Tat: Imchaben/Redisen/Moaren/Maongmen/Tiaren etc.. Akhi mapang otsüla tenüng Etiben liasü, tanü asüng tebur tenüng Imchaben jatsüa lir. Redisen ya yim kar nung teburtem jatsüa lir. Saka yim kar nungbo tetsür nem jatsüa lir. Ano Tir Yimyim nung anogoshia sor küm ka mesüra ana ajungba temoatsü meshia adoktsü dang Moaren Imsong mesüra Tiaren Pongen ta adoka angur. Nisung tenüng yamaji tesadang tang aliba agi atsü-apong mebendangteter. Kin kidong tenüngjia aser common dang agüja lir. Anungji ni shinübaji asen oshi tobur ajungtsü aser bentet benteta alitsü atema tebur süra Moarenba Imsongunger, Tiarenba Pongener ta amshitsüla. Ano tetsür süra Moarenla Imsonglar mesüra Tiarenla Pongenlar ta amshitsüla. Tenüng tesadang ka dang amshiba ajanga aiben telok tentet nung timtem angutsü. Anungji ni shia aruba ajak shitak amshia aru nung tang asen Ao lima ya tali ajungkettsü ta kü o tatsü agi nübur ajak den iba ocet ajanga lemsateper. Tsüngremi iba onük azünger ajak moajangma.