Asen ayak kechiba yokdoker ? Mini-hornbill benjong ya nüngdak nuh?

~ Dr. Asangba Tzudir.

Mini hornbill benjong Nagaland sorkari Naga kin shia pei benjongdi mapang amongtsü sentong atongba joko asen Aor-i iba mini hornbill benjongmong lapoktsür amai Tsüngrem mong mapang amongtsü sentong renemogo. Oda Hornbill Festival December 1-10 tashi amongba agi momongshir amai joko pei kin benjongdi amokbanga iba mini hornbill mongyonga aotsü atongtetogo. Asen lima Nagaland ya joko teimtem khuret aser tebilemtsü kecha mali amai kum tepiyong Hornbill benjong ang amongtsü.
Hornbill benjong joko küm aika monga arur aser iba benjong ajanga akidang nungi asen sobaliba benjong koda monga aru aji joko ‘Commercially Westoxicated’ kumdaktsüogo. Asen ayak chichiba nung rangloker amonger masü saka ‘entertainment’ benjong ka amai kumogo, aser ano iba benjong amongtsü atema sen bo aika endoker saka revenue bo kecha balaka marur. Tourist-a joko kanga tajemba kumogo. Nüpurtem aikati hornbill benjong amongbayim nung tahtsü talang aika shisadanger kelen iba benjong ya maneni amongtsü nuh ta tasüngtangba akaba mapang ano asen sorkari iba mini hornbill benjong amongtsü ang apitetogo.
Iba mini hornbill benjong ya kin shia benjong ajungkettsü nükjidong nung district shia DC ajanga tribal Hoho den angatettepa sobaliba dak sendakba sentong den musical sentong aser adventure sports akatsü sangtongogo. Kodang administration lenisüba nung acha-ayangdir aiben nüpurtemi mulungba nung masu saka administration-i mulungba nung amongtsü. Aser sorkar o administration na ajanga sen endoka ayonger asünung nüpurtemi nunga ta meshiteter. Joko kodang kin shia benjongji hornbill format nung mongdir asen sobaliba tepur tajung aser tetezü aketba benjong ya Tsüngrem mong masu mini hornbill benjong ang küma aotsü. Aser soakari ayonger asünung political, commercial aser carnival benjong amai amongtsü. Iba den, tanü putu tensa taginüba, tejangraba aser jilo ajinüdang oda asaa agi asen ayak tajung tanü putu dang yokdoker ati.
Asen lima nungbo Nagaland Zoological Park nungang joko hornbill ozü ji kar lir aser ajia teimba ka ‘duplicate’ saka Nagaland sorkar sentong nung district ajak hornbill benjong agi asüngtsü. Tenüng ji Tsüngrem mong saka iba benjong amongyim ji popular culture den saku aser item ajanga asen tetezü tajung aketba benjong samadaktsür.
Tanü putu nung asen sobaliba reprangdangra sobaliba sobusolemtsüa tanü asüng ‘purapuji’ fashion mesüka kumogo. Joko tsüngkotepsü masü waist coat ang tesapuba semteper; sobaliba ken a joko teimba tongti tesemdanger ang naklüa nüngsang tenteper; aser tsüngsang tapu balala tua samaa odagi. Item sobaliba nükmen balala shia asen lipok, otsü aser tatishitsü taret lir aser item samabaji asen oshi aser ayak samar.
Asen ayak samaa aoba tensa ka nung asen Aor benjong tongtipang ana – Moatsü aser Tsüngrem mong ajanga kodasür asen lipok aser ayak tanaben shia arudakja amongtsü ta tebilemtsü tulu lir. Mini hornbill ya masu saka kum shia Moatsu aser Tsüngrem mong asen Aor tsükong terok shia yim melentepa among nung ajungtsü. Kodang yamaji mongdir, yim aser tsükong nung teputep aser telongjem adoktsu. Talisa, tsükong aser yim shia benjongji tebur tajungba metsünga reta amongtsü. Tongti tesemdanger mesüra tetushi tejaoker mejaokyonga ajungtsü aser yimer tsükongsanger ajakji tongtipang nisung ama amongtsü. Yimtsüng nung amonger asünung lanulaji tem-a Moatsü aser Tsüngrem mong koda monga aru, aser tetsü tebou ken balala aser tsüngsang balala angazüktsü. Yamaji mongerbang asen Aor oshi aser ayak mesamatsü.
Bilemer, iba mini hornbill benjong kin benjong tenüng amer district shia amongba ajanga tajangzük balakabo mangutsü, kechiyong asen oshi aser ayak samaba aser mini hornbill benjongmong nungi ‘tajangzük’ arubaji medemdangtsü makok. Oda, Nagaland sorkar ang menüngdakba sentong nung sen-o-tsü endokba ang asütsü akok. Tang tsükdak rongdak tebilemtsü, tenüngdakba aser teinyaktsü aika lenmang nungi tenzüker lir. Koba ang-a meinyaki dang sünga lir saka sorkari anir nüpurtem ajonga kum tepeyong mini hornbill ji monga aotsü aser küm tatem nung benjongtiba “Hornbill – festival of festivals” ji amongstü. Asen sobaliba benjong tanü asüng jilo mesüka amongtsüba yabo tajangzük mali aser menüngdak.