Asen jabaso-jalaji asen noksa lir

~ L. Kika Pongener.

Asen jabaso jalaji asen noksa lir, kechiaser tsürabur kechi aji chirnurtemi sayutsü. Tsüraburtemi mapa tajung inyaka ochishia lira, iba senmang tajungji chirnur aser semchisemnur tashi amangtepyonga aotsü. Sungdong jungra iba sungjangji ajungtsü, saka sungdong mejungra iba sungjang-jia majungtsü; kechiaser sungdongji kechi aji pei sungjang agi meteter (Mathi-12:33). Tetsü-tebui tasen chira chirnur aser semchisemnur tashi tepo mejemtsü (Ezekiel-18:2). Ozü tsüraburtemi temenen mena, aser parnok joko mali, aser onoki parnok tai temenen khu abener (Aiatai-5:7). Sungdong ajak nungbo sungjang tajung matanger, sungdong kar nungbo sungjang tarak keter tachitsü mejungi tangteter. Asenoki iba sungdong telung nungji lep-poka reprangdangra, ashiko iba sungdongji tila asüdang nok agi leptur tarak keter indaktsüba asütsü akok, mesura ali telung nung tera ayangdak mesen (Worm) agi chir alitsü akok, mesura sungjang atangtsü teben apongba mapang mesen aiba asütsü akok. Aji oda, ibala timtem jagi sungjangji tarak keter tachitsü mejungi tangteter. Yamaji asen mimchir taküm libaliro nunga tsürabur taküm libaliro mejungra jala jabaso tajung mesotettsü. Tsürabur ashi-auer sura chirnur-a ashi-auer sotettsü, tsürabur ashi-külak nisung sura chirnur-a ashi-külak sotettsü, tsürabur yimten yimli, arogo aser lokti raksatsür nisung sura chirnur-a kasaji sotettsü, tsürabur ochi mashi tiyazür nisung sura chirnur-a ochi mashir tiyazür sotettsü, aser tia maka karbo chirnur sopet-tangpet aser mata-mabensa sotettsü aser senmangtsüsa chirnur tajung memoatsü akok. Luke-6:43-45.
“Kechiaser sungdong tajung nung sungjang tamajung matanger, mesura ano sungdong tamajung nung sungjang tajung matanger. Kechiaser sungdong shiaji pei sungjang agi meteter. Kechiaser ayidong nungi nisungi mongu maonger, mesura korishidong nungi parnoki tsükmenatsüjang maonger. Tasendong nung tasenjang atangtsü aser takodong nung takojang atangtsü”. Yisui tasen lai osangtajung kakettem nung ashibaji kangasa shidak lir “Sungdongji kechi’ar sungjang jagi sayutsü” aji kanga dang shidak lir. Anungji nisungi metetyongjia, memetetyongjia, anguyongjia manguyongjia, asenoki indangindanga ochishia alitsüla. Asenok adenba aser tenzükba lokti ajak nung tangari asen dak temulung lemtettsüsa asenok takümji alitsüla. Asen mapa nung tangari mashishitsüsa asenoki inyaktsüla.Yamaji asenoki asen azü (Blood) memeneni meruk-meruka asüngteta wazüka yutetra, asen dak nungi chirnur tajung alima asoshi nungdakba watsü-wabong tajung sotettsü. Asen jabaso-jalatem ya asenoki züba-züba asenok nem odang moatsüba amai bilemer, saka item chirnur ya nu menden nungi Tsüngremi asen nem senmangtsü asoshi balaka asüngteta/meshiteta renemer yokba senpet lir. “Angang chirnurji Kibuba nungi anguba senmang lir; aser nu menden nungi tejangji pa senpet lir” (T.Ken-127:3). Atangji “Nu Menden”-ji asüngteta merukteta melira chirnur tajung mesotettsü, kechiaser chirnurtem ya nu menden nungi Tsüngremi asenok asoshi senmangtsü senpet balaka renemtsüba lir. “Nisung shia shibai Kibuba tsüngken tsübur, shibai pa lenmang nung jajar, pa tepelatsü. Kechiyong ne ket agi züsentetba nai achitsü, na tepelatsü alitsü, aser ne den junga alitsü. Ne kidang kilung nung ne kinungtsüji tejang atangba tsükmenatsüdong ama alitsü, ne chirtem ne langbang meketa oliv sungdong ama alitsü.
Ajiang Kibuba tsüngken tsübuba nisungji yamaji alitsü” (T.Ken -128:1-4). Asenoki Tsüngrem tsüngken tsübua pai mulungba ama taküm asüngteta litetra, ochishia indang-indanga litetra, yimten, arogo aser lokti tenzükba maparen ajak nung ochishia indangindanga tenzükra, Tsüngremi asen nem senmangtsü chirnur tajung moatsütsü, aser chirnurtemi asen nem meyipa temoatsü agütsütsü, parnoki asenok anisungzüka lidaktsütsü, aser asenok iba temoatsü maongka nung arishia pelaseta taso-a shizüka alitsü. Ibaji Tsüngrem tsüngken tsübua alirtem asoshi temoatsü senmangji lir. Ajisuaka, shirnoki Tsüngrem jashitsüsa, nuburi maginutsüsa yimten, arogo aser lokti nung pesaperong, mepetmesu aser telemsa adokdaktsür, parnokjibo Tsüngremi tera dena atsütoktsü, tetezü senmangtsüsa chirnur tajung mesotettsü mesura soteta aliyong-jia senmangtsüsa masütsü. Anungji asen dak nungi chirnur tajung jakzüktsüsa asenok taküm alitsü kanga tongtipang. Aji oda, nisungibo kechi shidir shiang, nisungi anguyonga manguyonga asenok takümji ochishishia indang-indanga lira, ashi-auya mesui kümdanga lira, ashi-külak mesui kümdanga lira, aser taküm libaliro asüngteta lira, asen dak nungi chirnur semchisemnur tajung/tetemjen senmangtsüsa sotettsü. Ajiser chirnur semchisemnurtem temoatsü nung asenok jangratema pelaseta arishia alitsü. “Kibuba dak amangang aser tajung inyakang; ajisura na ali nung taso shia alitsü” (T.Ken-37:3). Asenok alima nung tatsüka alidang jangratema pela-a linura, nisung ajak den yimjung nung lidi, Tsüngrem-er temoatsü nung taso shia linura mapa tajung inyakdi, aser taküm arishia linura ochishia lidi. Shirnoki ochishia taküm junga alir parnok sulen teti temoatsütem anidaktsü.Temeshipur senzüka yutsüba ni mangu; mesura pei chirtem meshimetsüba ni mangu (T.Ken-37:25). Asenoki ‘O’ agi aika rasaa mejembiaka, asen jabaso-jala jagi asenji kechi’ar sayutsü aser asenok taküm koda lia aru ajakji parnoki sayutsü, kechiaser asen jabaso-jalatemji asen noksa lir. Anungji asenok dak nungi sungjang tajung alimai ongzüka achitsüsa, asenoki asen tenzükba yimten, arogo aser lokti ajunga nung ochishia/indangindanga tenzükdi. Asenoki aseni inyakba mapa ajak nung nuburi temulung lemtettsüsa, tangari ngu-aka, mongu-aka, metet-aka, memetet-aka, tashishitsü kecha mekai ochishia /indangindanga inyakdi/tenzükdi.