Asen lenirtem bilemtetba mapang

Taküm küm India nunger temzüng ozüng lateta amshitsü tenzükba anogo, Republic Day amongba anogo nung Nagaland angh alidak senden aliba takdang ka tenüng Dr.Imkongliba Hall ta melena naroküm agütsüba den Nagaland akümtsü asoshi India government den ken o jembirtem ajak bilemteta amongba sentong ajanga asenok nem asen tsüraburtemi asenok asoshi timtem aser tetsübu ajak tizükteta inyakba mapatem bilemtetdaktsüogo. Iba denji ano, saisapong tsütsülena Kohima nung Nagaland government-i Northeast states ajak jaoka Dr.T.Ao tenüng nung football asayamong sayaa amongba sentong ajanga asen lenir Dr.T.Ao sempet agi alima kintemi , talisa, Ao kin metettsüsa inyaktetba mapatem bilemtetdaktsür. Aiben asenoki asen lenirtemi taoba mapangtem nung mapa tajung inyakbatem mebilemteti asensasa tanü asen aliba lima ya mesemteta alir ama bilemer. Aji oda, tangari asen kin metetba aser asen nem akümtsübu agütsüba temoatsü aser maongkatemji tanü asenok dak tashitemetet tilaka aliba agi mesüra rongsen tera akaba agi züngshir amai bilemer. Ajisüaka, tanü tangari asenok züngshitsüsa metetbaji yimten mapa nung asen tsüraburtemi tasüa majem bendanga agüja inyakba agi, tamangba tsütsüa tanüla tarongba tulu lia, timtem jenti agia, tangar dang tanüla tekümtet osang sangdongba agi, kaketshisatsü tsütsüa tanitebelem arema tejangraba tulu nung tangar shisa tenük lapoktsüba aser Dr.T.Ao nunger amaji pei dak aketba sempet agi lenir akümtsüsa inyaktetba mapatem ajanga tanü tangari asenok nem aküm agüja züngshir. Tanü Nagaland nung alirtem asenok asoshi tagitsü küma amshia aotsüba senmangji item tsürabur lenirtemi inyakteta yutsüba mapatemji asütsü. Iba jagi, ano Naga nungertem rongnungsa süaka, asenok Aotsür Aortem ya tangari samanirtem ama züngshir. Atangji, nisungsa asünungji asenokia samanir naroküm tenüngji aginüa Nagaland government dang meshizükogo, anungji Nagaland nung asen Ao lima dang Samanirtem lima, Land of Pioneers, ta ajar. Tanü ama mapang mapang shia tangari asen lenirtem mapa tajung bilemteta tushidang, asenoka parnok dak nungi jakzükba chinurtem ama asen lima aser nübortem asoshi alir asü (?) mesüra asenokbo asen ajangzüktsü asoshi dang bilema alir (?) ta parnok taküm mapatem den asenok taküm mapatem medemdanga bilemdangtsübaji kanga tongtibang lir. Item tsüraburtemi nükenbelem jenti agia Naga nungertem asoshi anisüngzük bener arutsübayong asenok samanirtem kin kümogo. Ajisüaka, Ao kin ya samanir kin ka liasü ta jembitsüsa dang alir asü (?) mesüra tanüa samanir kin lir ta shitettsüsa asenok alir ta asüba tasüngdangba nung tanü asenoki kanga süoki ia bilemdangtsüla. Samanir ka asütsüba mapaji temela masü. Paji par kidang nungi mayazük, pa kolak nung tzünglua majalokdang aser anüa mepulokdang, kenyongi tetsübu aser ayatsüra tensa tia majurudang ser samanir akümtsü makoktsü. Kohima, Dimapur aser Mokokchung kija nung ita sen tulu chia mesüra business tajung inyaka anisüngzüka aliba agidangbo asenok samanir mesütettsü. Samanir dak aketba jakla yimyaji pei kija ajungtsü aser akatsü asoshi inyakba taküm masü saka pei ajangzüktsü mebilemi asen taküm aser mapa, asen shisatsü aser asen rongsen agi tangar ajangzükdaktsütsü merangbaji samanir ka mapa aser jakla asütsü. Samanir dak tangar tajung kümdaktsütsü jangraba tanüla alitsüla. Iba tangatetba jagi tangar asoshi tatishitsü tajung küma alitsü meranger. Aji oda, samanir kinibo mapai maoba aser meinyakba sen agizüka agitsü aaktsüla. Samanir kinibo yimten mapa nung senyong mesüra mapa yong pei temeten yoka machitsüla, tashiyim agi masü saka tangatetba agi akoktsü merangtsüla. Timtem aser takoksa ajurutsüa akok, saka samanir takümbo tiyazü nung masü indangindanga alitsüla. Tanü ama asenok lenirtem bilemteta jembidang, asenoka parnok mesüka parnok senmangertema ta tangari asenok mapa aser jakla yimya nung shitettsüsa asenok alitsüla.