Asen lima nüktzü

Yashi Dimapur nung Tiala Imcheni züluba kaket ka tenüng agi ” Ao Lima Nüktzü ” sayaba mapang lai iba kaket zülutsü asoshi Ao lima yimtsüngtem semdanga aodang, tsüraburtemi la dang India sepaitemi asenok yim rongdoktsüba aser reshikangshiba aser tetsürtem dak tashiyim agi mapa tamajung inyakba indang otsütem ashidang, ” ni taoksa aser tetsübu agi khen khenbo kü teka atentena mezüluteti küma adok,” ta lai shia liasü. Atangji, 1950s nungi tenzüka India sepaitemi Naga nungertem tsübudakja aruba agi, joko Naga nunger asoshi tanurtem jepa aliba mesüzükdanga India sepaitem arudar tejep ta aser ajep manenra India sepaitem nem agütsütsü ta tashi jembia aru. Iba amaji India sepaitemi nisung pua bener orr khasetba, yim aser arem rongdokja nisungtem reshikangshibaji tetsübutsüka liasü. Atangji, Naga yimten nüchiso bushidang India sepai ket nung timtem reshikangshi ajurubaji Aotsür Aoertem dang masü saka Naga nunger kin ajaki ajuruogo. Ajisüaka, yim rongdoktsüba aser yimtsüng ana asem lokteper yim ka nung septepa (grouping) ayuba timtem reshikangshibo Ao kin dak alaka tangari ajuruba otsübo mangashi. Item otsütemji asenoki jungjunga bushidangra 1956 küm nungi 1957 küm tashi nung India nunger sepaitemi Ao lima nung yimtsüng rongdoktsüba ajak agi yim 40 liasü. Item rongnungji Mangmetong yimbo tertuku (19) ben rongdoktsü, Khar yim tuku (9) ben rongdok, Khensa, Lirmen, Yajang, Kelingmen aser Asangma yimtsüngtem tenet (7) rongdoktsü, Kupza yim pongo (5)ben aser tanga tanüngba yimtsüngtemji kar asemben, kar anaben aser kar ken ta rongdoktsüba otsü tejangja ” Ao Lima Nüktsü” kaket nung zülua angur. Iba denji ano yimtsüng ana asem lokteper yim ka nung grouping süa ayuba mapang kima yimdong nung tetsür tanur amongtsüsa akümba aser tashidak tapu balala adoka nisungtem asüba otsütem ajakji India sepaitemi Naga nunger mezüngmeshiba mapatem lir. Iba ama India sepaitemi reshikangshiba mapang “asükwa mangsa bosta nung seper tzüzü agi ayinba, mersü anüka tsüksar tenük aser temang nung jana aolen enoktsür reshikangshiba, langkoshishi azük nung sendaka yur iba kübok mi apur mersü ronga menemdakja mokozü agi kudakja, tsükden nung shi akonger amai nisung sendak yur milak agi meroka kangshiba, tenla kidang merangpong agi tuita yur pei nisung den medemdaktsüba, tetsür taküm yimjak nung raksatsüba, yimjak nung mangsa züka merenshia mekongshitsü nung kongshia maksüdaktsüba, mersü tzü nung nisung metena ayuba, temola nung long mejepdaktsür ano teka nunga long kaka amdaktsür mendaktsüba, tebok manung süng ataloker gari tsüng aor medem menüngba, süngdong nung langkoshishia sendaker züka merenshiba, tenla kidang tashiyim agi tetsürtem dak India sepaitemi parnok tzüra matem tashi amshir külena shiruru ama lisü agi alener parnok camp-i anir orr idakji amshia reshikangshiba, ojalatem yimdong nung shiruru danga teküpbokba jenjang nung tanur sodaktsüba, linük tenzüker telong nung alir aser Volunteer ama kinüngtsütem tebok nung tanur bena alidang India sepaitemi parnok dang, nü kinüngbo kidangi maru süra, na tebok nung tanur bena alibaji pai envelope nung seper yokba abenbaa na (?) ta kanga mezüngmeshia merenshiba aser kinünger teburtem dang tetsür tebok nung tanur bena alibaji tangsa ajetzükang ta amokmerena azükba, talidak ki aser jen rongdoktsüdang pei akaba rongsen ajak mitsü akümba ngua temulungjang pokmar asüba, arem ajunga rongdoktsür alu ayimtsü maka ayawara agi okrongsetba timtem tekangshitem tebang agi shir meshima aika indang,” “Ao Lima Nüktzü” kaket nung angur. Kodamasüji, tanübo asenok Naga nungertema aika India sepai nung lir. Ajisüaka, asenoki India sepaitemi asenok tsüraburtem reshikangshiba otsütemji meteta akümtsübutsüla. Shisabolutsü kaji, tang ama Naga nunger yimten nüchiso bushir telok kar den yimjung raksar raradang, akhidang amato masü saka tangbo Naga nunger India sepaitem o Naga nunger telong nung alirtem na raratepdaktsütsüa akok. Iba ama tensa mapang nung asenok ajaki pei tetsü taso lima aser nübortem asoshi tsüraburtem nüktzü yimdokba anogotem mamadoktsüla.