Asen lima shia arudagi !

Asen lima  nung asenok libaliru aser inyakyim nung kangasa ochimashi aliba agi tejashitsü, tesasatsü aser tamajung-tamajung ta angur dang ashi, asenok dak tangatetba tajung aliba agi inyakba mapatem reprangdangra asen lima mejungi raksaa oa aliba tesemtem karbo asenoki tanem-tanemi shia arudakja tajungba küma angur aser item rongnung asen lima arem aser asenok alidak ki anasa ozüsangnutem arua asaaa angashiba aser yimzüa anguba ya asütsü. Asenoki arem mapayui chitokba dang masü saka arem shiruru aser ozüsangnutema dena tapayua mapayui tepsetba aser khasetba ajanga arem nung shiruru mali akümba dang masü saka ozü olaa mangashi küm aika lia aruogo. Aji oda, arem shiruru aser ozüsangnutem ajak ya kati ka chia taküm alitsüsa yangluja lir, anungji, tatishitsü agi, kodang arem nung shitsü mesü melilir, keyi chiyongtsü mangur, anungji yimtaki adoka kiset shiruru aser nisung dena nguseta achir. Kasaji, kodang alilen ayazüba shiruru tilatem  mesüra süngku melilir, ozütem chiyongtsü agi anünger aser ano kodang asenoki ozüsangnu samatsüdir, ali nung ayazüba shiruru tilatemji achir mali tali pokteter aser item jagi alu chitsür aser tashidak poktetdaktsür. Iba amaji ano manga merila mali küma tepset nunga shiruru karbo chiyongtsü mangu timatemtsü, iba jagi tanü asüngbo tangatetba nung ramen tashidak nungi kümzüktsü asoshi merila samatsütsü merangba sentong nunga merila kata mali küma samatsütsübo memeranger. Aji oda, ozü kata mali sama nungbo süngku achir malitsü, anungji süngkuji tali pokteta süngku jagi alu chitsütsü. Kasaji, ali nung süngku kata mali aküm nungbo, ozü atema chiyongtsü maka ozütemi alu chitsütsü. Item ajakji Tsüngrem teyanglusang sentong lir, kechiyong Pai alima nung ya kati ka yaritepa alitsü asoshi dang yanglu masü saka taküm shiruru aser ozü sangnu süli, süngjanglijang aser süngolemba süli, item ajakji kati ka chia taküm alitsü asoshi yangluba lir. Itemji mebilemdangi asenoki pentsü ozü tashi mapayui kaseter aser arem shiruru kata mali ajak samatsütsü meranger. Aji oda, ozü kisüng mali nung süngku dang masü saka per dena poktettsü aser iba jagi asenoksa timatemtsü. Atangji, tanübo asenoka tangatetba kati aruba angur aser prangbong apur shiruru aser ozüsangnu tanguba ajakbo metepset aser mekhasteti kümzüka toktsür. Iba jagi anepdang aser nikongtsütsü, temenungratsüka, alu, arem aser ki temeket nung ozü telok senzüba aser asaba angashir. Ibaji asenoki arem shia arudaktsüba den külemi arem shiruru aser ozüsangnutem wazüka ayutsü asoshi tangatetba kati arutetba ajanga lir. Atangji, asenok ya shi achir kin aser shi rongnunga arem shisa tajungba, iba jagi asenoki kanga sapua achir. Ajisüaka, alima nung ya tanü asenok jangratema chiajemra ojang ta masü saka teti asüng atema bilema chia ajemtsübaji kanga tongtibang lir, Asenoki arem shiruru aser ozü sangnu samatsübaji parnok dang takoksa ajurur amai bilemer saka parnok kata mali samabaji asenok asoshibo lendong tulu lir. Iba tangatetbaji asenok rongnung maneni lemsateptsüla aser arem dang masü saka arem shiruru aser ozüsangnu wazüka ayutsüba mapa ya ozüng agi masü tangatetba agi inyaktsüla.