Asen Lima Ya Kodasür Shibai Yanglushitettsü

— N.Saku Imsong, 4th Mile, Diphupar: Dimapur.

Tamalen liner tajung aikati asen lima melenshitsüba, tongtipangsa, Tir Yimyim yimobilem (EDITORAL) aser olemsabang nung ngua aruogo. Aji oda nia asen senso ka asü agi temolung arong marem joko pungma ka süaka, tongtipangsa lanurtem dang temelong atangtsü o kar shinür.
Hai watsü wapong tajungtem, asen lima kanga mejungi raksaogo ta ayimtenba ya mangashir no? Ya shirnoki raksaba indang jembir ya ? Reprangangjo na amendakji, nokdakdakji, jajaba lenmang nungji miim agi yangluba bomb tesashi renemer yuja lirji, ngudar ma ? Hai nenoki anguba Degree-temji shizüka odarji. Kechiba temetetba ajangzüker Interest maliba bank nung yur kazüteper ta shinür ati. Nenok degree-temji koba state nung amshitsüba ayur ?
Hai ozü putu nungbo Govt sanction lemzüktsüba ochi shia inyaker sen tanüngba ajakji tanaben meyipasa agütsü. Kechiba onoki ochi dang metetba putu liasü, aji agi alimaji temoatsü nung liasü. Ano, onok mapangbo rarai aotsü süra oang ta kodanga mashi, saka ARUNG ta sür tema raktepsa apuso, aser takok angu. Anungji lanurtem nenok tepong langer ARUNG ta ayimtentsü mapang tongja tongogone. Kobika atatsü asen lima raksar ano mapang talangkabo mao. Tetsübu, tarendak joko mapang tongja tongogo.
Asenoki osang kaket nung anguba amato FINLAND nung mobile communication engineer MATTI MAKKONEN-e S.M.S mapatong inyaktet süra aser pa dang Father of SMS ta aja süra, naia asen lima asoshi langka tajung karbo inyakteta nübur ajangzüktsüsa shisadangarma ?
Laishiba nung Mathi 5:4 shiri mang ayimer parnok süneptsütsü ta shia aliba ama, asen lima raksaba atema mangyimer kaka asütsü koda ? Ano Neh 2:7-8 nung shia aliba ama, Nehemia pa kijai teraksa yanglutsü molungtet, nüburtem nem angatetdaktsü, aser Yirusalem jara raksa-a aliba anogo (52) ita ka sür anogo 22 nung yanglutet. Nenok ajak longjemer nüburtem nem angatetdakjang, süra tamangertem ajaki nübo, sarasadem aser maparen ajak nung yaritsü molunga lir. Anungji, tang ya mapang tajung ta angateta aliba amaji tamanir sür wajak nung nokdaker tarutsü nür lanu putu nungbo tangar state-tem danga nüma tangtettsüsa ARUNG ta walunir jilu yia ayimtenangnee. INDIA kübok state ajak rongnungi teraksatiba, ochi meshitiba, auyatsü nung molung ajemba tajungtiba, oda ajak dang teküpboktiba stateji asenok aliba state ya lir ta angateta bilemdanger mapa kümangnee ta mepishir. Tsüngreme lanurtem aser tazüngertem moajangma.