Asen lokti ajungtsü atema bilema inyaker ishika dang: S Chuba Lkr

January 11, 2017 nü Süngratsü yimtak 41buba AKTM kümsem lokti mungdang tananübuba sentong nung Parliamentary Secy., S Chuba Longkumer, Parliamentary Secy., Dr Imtiwapang Aier aser AKTM ketdangpurtem tangokba noksa nung angur. 

Süngratsü (Mokokchung), January 11 (TYO): Bodhbarnü Animal Husbandry & Veterinary Service Parliamentary Secretary, S Chuba Longkumer-i, tanü Naga loktilibaji pei atema dang bilemba lokti ka kümogo aser ajaki pei atema bilemer aser inyaker, ta ashi.
Pai iba o ya Süngratsü yimtak 41buba Asetkong Kaketshir Telongjem Mungdang (AKTM) kümsem lokti mungdang tanabuba anogo nung tongti tesemdanger o jembidang ashi.
Pai, nüburtem dak pei atema dang bilemba tangatetba aliba ajanga asen lokti ajungtsü atema bilema inyaker ishika dang, ta ashi.
Lokti aika tentetba atema tesasaba olen ka nung pai, “Nija tajangzük atema item ama teloktem adokba ajanga tanü asen lokti nung petsaprong/timtem adokdaktsür,” ta ashi.
Iba dak sentakba nung pai, asen lokti teraksa nung temelenshi ka bener arutsü asoshi kaketshir tentettemi inyaktsüla, ta ayongzük.
Paisa civil societies dang tetet nung yimtenren maitdaktsütsüka, koba aanga nüburtem tebilemba ataloktsü, ta ashui.
Kasa sentong tongti tejaoker, Geology & Mining Parliamentary Secretary, Dr Imtiwapang Aier-ia, tanü Naga lokti nung temenlenshi ka nung odar, kong telongjem maliba, pei atema bilemba aser kinkidong onüktem ajanga asen lokti tanepts manguba tashidak agi shirangdar, ta ashi.
Iba dak sentakba nung paisa kaketshirtem dang Naga nunger ka ama longjema alitsü atema inyaktsü ajungshi.
Paisa Langpangkong Kaketshir Mungdang ayonga Clean Election Campaign tenzükba pusemba den külemi AKTM danga pei tzükong nunga kasaji inyaktsü ajungshi.
Yaküm pa lenisüba nung AKTM-i küm pongu süngdong atemba, Greening Asetkong maparen tenzüka liasü, aser iba aparen takok angutsü atema pai kaketshirtem ajungshi.
Tanep AKTM Tir, Rongsennukshi Aier-i lokti pelaa agizük aser Asetkong Mungdang Tir, A Nungsang Jamir aser AKM Assistant General Secretary, Shilukaba Longchar natia o tasütsü jembi aser Imnasenla Aier-i ken tajung ka tena liasü.