Asen Naga nunger Politician-tem tangatetba ya tashi dang no… ???

~  L. Kika Pongener.

1963 December ka nü nungi Nagaland India küpok State ka kümer külen, India nunger temzüng küpok meyongnem aguja yimsüsür shimba (Election) nung dena arur. 1960’s nungi party balala-i yimten kümer yimsüsüa aruba political party-tem reprangdangra, mezüngbo ‘Interim Body’ election magi-ser kin shia nungi shimteter (Nominee) yimsüsüa tenzük. Iba sülen United Front (UF), Nagaland Nationalised Organisation (NNO), United Democratic Front (UDF), United Legislature Party (ULP), Naga National Democratic Party (NNDP, Indian National Congress (INC), Naga Peoples Council (NPC), Naga Peoples Front (NPF), aser tang Nationalist Democratic Progressive Party (NDPP) etc. item party balala-i melentepa tanü tashi yimsüsüa arur. Congress party-i yimsü asüba mapang opposition maliba assembly-a denjia aruogo, ano NPF sorkar mapang-a opposition maliba assembly-a denjia aruogo. Centre sorkar-a süang mesüra State sorkar-a süang opposition maliba sorkar kaji alima aser nubor atema takoksa tulu lir.
Aji oda, sorkar inyakyim tim masüba nung opposition-i tashi-ita nunga ta ola adok-aka, maparen aika nung ruling sorkar-i parnok mulungba nung odang attsür aor. Opposition liaka yamaji inyaker, süra opposition tashi-tait ka melira sorkar anema ola adoker mali alima aser nübor kanga akoksatsü. Tanü asenoki asen Naga nunger yimsüsürtemi Politics asayaba jungjunga reprangdangra, manganütsü mali tanür ‘Kisen asayar’ ama-ia ta ashitsüsa küma-odagi. Naga nunger atemabo party manifesto aser party ideology tangatetba-a kecha maka amai dang, oda tanü party ka nung denogo ta sangdongba osang nütsüng-nübor ajunga-ibo mangashi-jungi lia, anogo ishika sülenbo ano iba party-to toktsür tanga party ka nung denogo ta sepla-sepshiba angudang nübortem kanga süngmanger…!!! Political party ka nung primary membership & active membership akümbaji party ticket ammer election-i aitsüba nükjidong kisüng nung akümba asü (?) Mesüra party manifesto & ideology nung langka tajung chitetba agi akümba (?) Atangji iba ama teladak ‘cheap politics’ asayaba ajanga ‘Politician’ ka jenjangji anüla-anüla-a akümer aser nübortemi tanang mechiteti küma-adoker. Tanü Party ka nung dener lia jenjang mejungra ano asüngbo tatemtsü küli kar (lame excuses) bushir tanga party ka nung oa adentsü ta… tamongdak ka maka sepla-sepshiba Politician ka dakji nübortemi tamang mekateti küma-adoker. Politician ka yamaji tanü ajung asa-a party balala melentepa senzüdang pa sülen anidaker party worker-tem aser voter-tem tia-ji kechi jenjang nung yutsür (?) Koba Political party südir süaka, party workertem-jia Politician-tem tanü party ka nung, ano asüng tanga party ka nung ta melentepba shia parnok sülen anidaka, party melenshijen melenshira, asüng-yanü nübortemi nenok ‘party worker’ dak-a tamang mekateti küma-adoktsü. Public leader ka akümbaji küonung manger-mesangwa tsüngda atema, anogo ishika atema, mesüra party-i ruling nung ali tashi atema, mesüra minister menden atar portfolio tajung ammer ali tashi atema masü, saka party mesamai taküm ali tashi kechi jenjang nung lidir liang, ruling nunga liang, opposition nunga liang, party ideology nung akang-akanga ammeter masetshi-i nokdaktsüla. Naga Peoples Front (NPF) party-i anir term asem tashi atong-atonga yimsüsüa arur, tang küm ka renteta ‘opposition bench’ nung mena lia, tawa-tanü yimsüsür kar nuchiso bushiba mapa tatempang telemtetba ka dangi arutsü atema külemi longjemer inyaktsü asoshi ruling sorkar den oa lokteptsü asameyangba osang ngur nenok nem meyongnem (vote) agütsür nübortem süngmangteper…!!! Naga nunger nüchiso teküratiba nung telemtetba kati arutsü atema loktepnur asü (?) Mesüra ruling sorkar nung dener maongka kar agitsü lenmang bushir ta nübortem süngmanger…!!! Pei nokdakba party nung masetshi-i akang-akanga nokdaker Naga nunger nüchiso atema jembitsü aser inyaktsü lenmang sadem-sadema dang lir masü na…??? Ajak dak alaka, menden-60 agi akümba Assembly ka nung tatar-26 menden tesadang ka shi mena aliba (single largest party) aser tang temendak Rajya Sabha Member (Sitting MP) aliba party kati general election nung pei party candidate ka tenüng jateta shimteter meyoktetbaji alima aser nübor matsüngdang tamakok aser maaksü amai nübortem-ibo bilemer.
Party telung nung mepet-mesü kar ali asü (?) Mesüra kechi timtem ajanga ta… nübortem süngmanger…!!! India lima nüchiso ngur küm-70 dak tali süia arudang, küm-40 shi-ka Congress Party (INC)-i ruling sür yimsüsüa aruba tepiyong, BJP party nung yimsüsür tain-tem Late. Atal Bihari Bhajpayee ama aser L. K. Advani ama yimsüsür taintem küm-40 jungnüa ‘opposition bench’ nung mener aru-aka, pei party nung masetshi-i nokdaker, kechi tensa tia ajurudir ajuru-aka, pei adenba party toktsür moi akang-akanga nokdakba Politician-tem, tanü alima nübortemi kanga dang akümtsübur aser parnok nungi lesson tajung agir. Atangji election-i yir nübor tenzüktsü mulungtetbaji, adoker tatar menden nung amentsü, minister akümtsü, portfolio tajung atatsü aser sen aika bendener takar akümtsü…. Iba nükjidong nungji dang rangloker election-i aitsü apusora, ne dang alimai yimsüsür tajung ta majatsü aser ne dak nübortemi tamang mekatettsü. Tanü asen lima nübortemi sepla-sepshiba yimsüsür masü, saka ochi nung akang-akanga nokdakba yimsüsür aginür.