Asen nisung dang alitsüla

Yimti yimdong nung aser ainlen senzüdang lenmang lenjang saka tezülen mener aonsutsü, süngjanglijang aser pei kidang renemba azüku mesüra amtsük amala chiyongtsütem yoka angur. Itemji asen nisung aser parnoki ayokba aonsutsü aser süngjanglijangji parnok atsü aser alu nung züsentetba aser  chiyongtsütemji parnok teka agi pei kidang renembatem lir, anungji kanga agia shishilembadak ki tajung nung mener ayokertemi ayokba chiyongtsütem dang nungi tajungba aser jenjanga dalangba asütsü. Atangji, yamala pei alu, atsü aser kidang nungi chiyongtsü tapu balala renema bener arua nisungtem senzüdak lenjang anasa mener yoka amenba jagi senzüsenpongertem nembo timtem kanga agütsür, anungji nisungtem nem timtem magütsütsüsa lenmang lendi nungji masü saka yimteni tesem tajung ka mesemteta yangji kecha taa magii angati mendaktsütsüla. Lenmang nung mener ayokertemji, odanga, timtemer aser sensakertem lir, iba jagiang shishilembadak ki telong nung mener yoka amentsü makoker . Kodang asenoki itemji angatetdir, asenok ajak parnok asoshi teyarir tajung kaka akümtsü aser parnok yaridang asenoka tajangzük angutsü. Akok tashi shishilembadak, talisa tsümartem dang mozü amshia züsentetba aser mozü agi tamajung mekümdaktsüi ayuba chiyongtsütem alitsü agibo, asen nisung dang mozü mamshii züsentetba aser mozü amshia tamajung mekümdaktsüi ayuba masü saka tang ongzükli, yatali aser renemli ayokba chiyongtsütemang ali kanga agia tajungba. Atangji, asen nisungtemi ayokba chiyongtsütem alitsüba kuli tajung aika lir saka tongtibang kaji, yimdongdak mener chiyongtsütem ayokertemji makamaitertem lir, anungji parnoki lenmang nung yur ayokba chiyongtsütemji ayok nung dang par kidang oagi kinungertem chiyongtsü. Aji dang masü saka item ama ayokba jagiang parnok tanurtem kaketshidaki yoktsü. Ashiko, item tsüraburtem kar chirnurtembo college aser university nung zünga alitsü, anungji asenoki parnok dang kechisarina aliba sen jagiang item kaketreju nung nüngdakba sen agütsütsü. Ashiko, karbo kidang pei apuani mesüra tanur shiranga alitsüa akok, itemji parnoki yokzükba sen nung jagiang anepalutsü. Aji oda, yimdong nung mener aonsutsü aser chiyongtsü tapu balala ayokba nungi aruba agiang benjongbentsü nung süoshi tasen kakabo alia semtetba kibong aika lir. Itemji angateta kodang asenoki yimdong nung chiyongtsü ayokertem dang nungi alidir, asenoki par kibongji yarir amato akümer. Atangji, karibo jenjang kanga saaka meshir aser ano talirtema karibo jenjang kanga züreptsür, ajisüaka tayokertem jagia jenjang shitak dang meshitsüla aser talirtemia parnok dangbo tokang ta meshii dang pelashishia alia bener aotsüla. Asenok aikati hotel tajung nung chiyonger mesüra süngo jemer yangji inyakertem dang temeim sayua angati sen ter, metsü, tenem aser noklang junga yutsür saka lenmang nung mener chiyongtsü ayokertem dang nungi sen metsü agi aonsutsü sünglang ka mesüra süngjang ishika alitsü atemabo kanga korur aser ashishiteper. Iba amaji mesüi asenoki asen nisungtem taküm aser kibong tia indang yimdangi arua bilema parnok yarir amai tajungshi o tajung shia alira, iba jagi asenok ajak tepela aser teyari angutsü. Tanabuba kuli kaji, lenmang nung ayokba aonsutsü aser süngjanglijangtemji terepangtsü nung topurbo majungtsüa akok, saka asen temang atemabo itemjisa tajungba asütsü, anungji aji bilema asenoki alitsü tim. Kasa aonsutsü aser kasa chiyongtsüsa asüyonga asen nisung dang alibaji tajungba dang masü saka asenoki asen nisung ajungkettsür. Ano, ibajiang tongtibangtiba. Aji oda, kodang asenoki asen nisungtem lenmang nung mener ayokertem dang alidir, parnokia ano tali temerangba inyaktsü. Iba amaji yokayoka temeranger aser shisa akartemibo dokan tulu küma tangalenia dena yoktettsüsa shishilembatettsü. Ashiko, aseni kenü lenmang nung mener ayokertem dang nungi aonsutsü, süngjanglijang, amtsük mesüra lon aliba sen agi akümba tulur aser takartem ajanga kenü asen lima aser nübortem yariba asen tenük agia angutsüa akok.