Asen oshi cancer tashidak agi menepogo

– Odi Jamir, Kohima.

Tamalen Ao oshi ya ramen agi shiranga mapang shia ajunger ama süli ano tali shiranga aita tamajungba kümli ta aruba tang Ao Dictionary adoktsü renemshiba yagibo cancer tashidak bener arutsüogo ta sasaseta Tir Yimyim January 04, 2017 nungi January 12, 2017 tashi züngogo. Iba sülen Aor temeteter aikati Ao osep nung mapensaba aser talila puralokba metongshija züluogo, aser item metongshitsüba asoshi tanü tashi temelenshi kecha mangur, tanü nia parnok den o semloka shinübaji English nungerji par oshi den putep ABCD yanglu idakji aliba A to Z ajakji Ao nung amshitsü merangra Ao oshi benjatsür aser cancer mesen inoktsüba den saku alitsü. Asenoki takar kidang akaba molok nungi shir nok meritsüng tashi apua bener maruli, asen nüngdak yari apudi. Ano aika rongnungi ka shinübaji January 5, 2017 anogo Tir Yimyim page 7 nung fungza ta Ao nung shidak amshia liasüba MEJA dang FUNGZA ta inoksema lir, iba nungi angatetbaji tang nungibo school nung shibai Ao nung meja dang fungza ta züludir aji tai masütsü, yamaji nisung nungi tenzüker süngolio aser jembishinü ajak Ao nungi Mongsen agi meyipa züluaka aji tai masütsü ta angateter, kechiyong Ao Senden Literature Board ajanga adokba Dictionary nung zülua lir, shidakba agibo Fungza ya pa balaka masü, Meja terasa nung Mongsen agibo Fungza ta ajar ta enoksemba tapetba. Makaba bushiloktsü melena shidak lirumedema amshia alibasa melenshijen melenshira oda Jungli nung akaba Mongsen agi zülushir, saka tasenbo enoksema maka ta yamai süra Ao oshibo tesüleni lujen alutsü, joko asen oshi iba cancer tashidak nungi mesakteti iba yipden nungi shizüka aotsüsa nükla nung angur, iba tashi mait teraji Ao oshi junga meteter aser Ao nung MA tashi renemer paika liaka Ao mazüngeri Ao Dictionary yanglutsüba tai agi ataloker asütsü ta kü tangatetba lemsateper.