Asen sobaliba atema nümatanga bilemang : PB Acharya

Kohima, February 23 (TYO) : Nagaland aser Assam Angh, P B Acharya-i sensosangertem dang linük nung sobaliba takar aliba atema nümatangang ta ayongzük.
Mongulbarnü State Academy Hall, Kohima nung “Discover North East- A Cultural Yatra 2016” sentong lapoktsüdang, Acharya-i “asenoki asen sobaliba takar atema nüma atangtsüla” ta ashi.
Iba sentong ya North East Zone Cultural Centre (NEZCC), Dimapur-i Arts & Culture Department, Nagaland den külemi yaritepa ayongzük.
Sentong nung NEZCC Director, Lipokmar Tzudir-i o jembidang, “mapang talangka North East zübazüba liogo saka linük yangerba mapa nung asenoka tangar den tebilemtsü khuret kasa dang lir. Asen teinyaktsülen metettsü atema Discover North East ya kanga tongtipang” ta ashi.
‘Discover North East Yatra’ ya 2015 nungi tenzük aser iba ya kümshia amungtsü, ta Art & Culture Director, Vevo Sapuh-ia tanü sentong nung metetdaktsü.
Tanü agiba sentong nung Madhya Pradesh, Rajasthan, Assam, Arunachal Pradesh, Meghalaya, Manipur aser Nagaland nungi sobaliba dak sendakba yartsüngsanger aser ken atenertemi shilem agi.
Sentong nung Konyak Baptist Church Kohima sannüker, Moba Konyak-i temoatsü meshia sarasadem.

You must be logged in to post a comment Login