Asen taküm lenitsü asoshi Tsüngremer Tanela Temeshi nüngdaker

Dimapur, March 24 (TYO) : Hokolbar nikongtsütsü Reformation Crusade sentong nung tongti o jembirji Rev. Zotuo Kiewhuo liasü aser pai ‘Tanela Temeshi’ indang onük jembi.
Taonung Rev. Zotuo-i ashibaji, “alima nung alir meimchir tulu tila ajaki Tsüngremer Tanela Temeshiji asen taküm lenitsü asoshi nüngdaker, aser asen Tsüngremi mulungba aser inyakdaktsünübaji asayamenü ka ama kodanga aseni mebilemtsüla aser magizüktsüla.”
Tanela Temeshi ajanga asen den koda jembir yamaji asen taküm kaji lia aotsüla. Efesa 2:8-10 nung shia aliba ama, neü takümji nü sasa alir masü saka Tsüngrem temeim taochi ajanga nü takümji kümzüka len ania arur. Shingaia pei sasa alir ama asükümtsü menüngdaker. Anungji Tsüngremi Pa mesükba nung Pa tenzüktsü asoshi na yanglu asünung aser na meyangludangyongi Tsüngremi naji meteta lir asünung, nisung shiai alima nung alidang mapa tajung Tsüngrem asoshi inyaktsüla, ta o jembirisa ayongzük.
Tanela Temeshi ajanga asen taküm nung kechisa inyaker ajakji meteta lir. Anungji Tsüngrem dang asen tai tatok nangzüka temeshi taküm kaka alitsüji Tsüngremi mulungba lir, ta paisa shisem..
Luk 10-19 nung, tsükchir anema takokba ajak agütsüogo anungji kecha tetsübutsü maka aser shingaia na meyirutsütsü, ta shia lir. Aji oda süaka Tanela Temeshii na len aniba asoshi tenüngsang tagütsü saka kotak nung tenüng zülüokba atema tenüng sangang ta tongti o jembir Rev. Zotuo Kiewhuo-isa tesentepertem ayongzüka liasü.
Maneni pai Yerimia 1:9 nung ajemdaker jembidang, Tsüngremi Pa tangola asen nem apuoktsüoko anungji alima ajak dangi oa Tsüngrem osang proka, alima nung teraksa ajakji yanglushia Tanela Temeshi ajanga aginüba ama asen taküm ajak temeshi taküm ka ka alitsü merangdi ta tayongzükba agütsü.
Sentep tatem nung tongti o jembiri Tsüngrem nungi tanebtsü aginüa alir asoshi sarasadem agüja nisung aika nem shi nung aser tanela nung taneptsü ngudaktsü. Taonung sentong nung nisung meyirjang aika dena temoatsü agiogo.
Taonung sentong lennirji Khuzhami Baptist Church pastor, Niko Mero liasü, AG Church Asso. Pastor, Zajamo Kikon-i temoatsü aser Tenla meshiteta sarasademtsü aser Mezhusevi Zhutso & team-i tekülem aser tetushi agi.