Asen Temeten Wazüka Ayutsüla

~ Tsupong Longchar, Tongdentsuyong Ward.

Mapa(Project) ajak nung nükjidong ka yur tenzüker, nükjidong meli-i inyakba mapa alima nung mali.
Asen tsürabur mapang Naga yimten tenzüker aser Khrista lokti tenzüker tangatettep aser telongjem nung yimten aser tamangba yimsü wazüka ayutsü asoshi ochi nung nokdak.
Kechiyong par tangatetba lai O nung majang ayang. (Nenoki oang aser kin ajak nütsüngtem Kümdakjang. Mathi. 28:19)
Ao regional council aser Ao Arogo Mongdang telongjem nung Yisu osang tajung den kaket shisatsü Naga kintem dangi oa tesangwa milen tsüklokja Yisu nütsüng kümdaktsüba otsü-ren nung tejangja lir. Iba den ano kasa lokti ana telongjem ajanga America kin den yimten aser tamangba ren nung amalitepa aotsü nükla tajung ayuba den Gideon-i ashi ama (O bendanger 8:23) Naga lima ya yimsüsüba menden, mapang, taküm aser rongsen Yisu meyong ta tangatetba tajung renemer 1968 (C.E) Ao Christian Lanur Mongdang, Changtongya yimtsüng nung amongba mapang (Nagaland For Christ) Ao lima nung sangdong. Küm ishika lir külen, 1972 nung NBCC ajanga Naga kin ajak dangi sangdongba otsüren angazüka aruogo.
Tanü shisadanga ao nung Indian temzüng (Freedom Of Religion) nung ajemdaker Naga yimten temeten aser Khrista yimsü tanülar wadang nung tashi mait kümdaktsütsü asoshi Central Govt-i State Govt. ajanga inyaker amai ajiteter.
Nagatsür Gaidiliniu nem India nungeri Freedom Fighter, Naga Rani naroküm agütsüba den la tenüng nung Museum cum Library Kohima nung yangluba ya nükjidong kechi lir, aji nuburi angateta atatsü tim.
La taküm alidang Naga yimten temeten anema India puküma inyaka arudang Hindu nunger den la yimsü (Heraka) ya koba jenjang ka nung sendakteba ayu ashitsü makok saka 28th July 2015 anogo Delhi nung senden amenba aser la küm noklang ajungba benjongmong nung Memorial ki yangluba maparen nung sentakba ternemba kar aliba angazüker.
Terenemba kaji Kohima nung tamaitsü (Memorial) Ki yangluba ya Heraka yimsü tesayuba aser nükjidong tejakleni odaktsütsü asoshi( Setting up of a Memorial in Kohima for promoting the tenets and ideals of Heraka religion) ta renemba angazüker. Iba ama terenemba yangludang state Govt. nungi shisatsü mangi-i kodanga merenemtsü.
Atangji, iba amaji renema alinungbo 1st october 2015 anugo Nagaland Chief Minister-i Ao Senden dang iba maperen nung sendakba O ashiba ya tiyazü aser pa menja aponger atsükshishir ama aser asen Aor ashioktsütsü merangba mapa ka dang ta angateter.
Tanü osang kaket nung kari Gaidiliniu anema aser puküma langzütepba züluba angudang Nagaland Sate Assembly nung züngsem 60(members) rongnungi katia ola madok nung kechi atema nüngsen nüngmen agütsütepa tai menatsü, kechiasür parnoka Gaidiliniu denji alu ama yongrü ka nung dang rüsema lir ta aseni angatetdi.
Naga nungner peisasa dang yimsü süa shinga kin kübok malitsü ta 99.9% agi meyongnem agir alima dang sangdongba anema India pukümer ka nem India-i konang naroküm tet]ushi agütsüba nung kecha tesüngmangtsü mali, kechiyong tanü tensa nunga sen dak rangloker Indian puküma senzür lokti lenir aika alitsü akok.
India nungeribo Heraka tamangba den tesendaktep tajung yur teyari agüja 1951 meyongnem aser Naga lima Khrista asoshi ta amenoka aliba ya ajemreba Indian temzüng kübok Naga nunger amokbanga yur Gaidinuliu ya Naga nunger tsüngrem(goddess) ta nungja agüja külemdaktsütsü asoshi asa meyang süa alitsüa shibai metet ? Kechiaser iba ama inyakba ajanga dang Naga nunger tali lemsashitsü ta Indian Govt.-i jungjunga angateta lir.
Naga nübur Govt. (NPG) kari (Nagalim For Christ) ta official maparen nung amshiba angur, süra State Govt.-i iba ama inyaksaba mapang nung metongshi-a yutsütsü parnoka shilem lir ta angateter asü mesüra odang toktsütsü parnokia ken shisadangtsü nüngdak angur.
Tanü Naga senso aikati züzüa dang bilemer saka 1951 meyongnem aser Naga lima Khrista asoshi ta iba oren ana ya Naga yimten aser tamangba yimsü nung ochi temetenji lir aser iba ya alima sangrasangji ajanga raksatsütsü aser samatsütsü makok.
Anungji Tsüngremi asen Naga nunger nem koba temeten agüja ali iba nungi asen Ao senso ajaki ochi agi nangri kanger Yisu Khrista aser Naga yimten asoshi mezüng osang tajung, tesangwa milen tsükloker kin ama tsürabur tsüngsüji maitsüli.
Iba den iba wadang asoshi Khrista amangba pur ajaki pei tamang yari kibok nung asen kümtetdakba Yisu dangi khuret abentsü tim ta angatet nung kü shisa yari aser Ao sensosanger den iba osang kaket ajanga lemsateber.
Tsüngremi tazünger ajak moajang.