Ao Senso nungi ni jendokba ken-o nung kü tebilemdangba onüktem

– P.Chuba Ozüküm, Kohima.

Ao Senden-i ni Aor senso nungi jendokba dak sendakba ken-o nung kü dak atalokba aser ni tenjia arubatem metong metonga ayutsü asoshi ni iba zülu ya zülutsüsa akümer. Ao Senden-i ni Ao senso nungi jendokba telemtetba ya agizükstu mulunga dang lir saka ni ya tashi tenjitsüsa akümba indang ataloka arubatem tatongi nuburtem nem metetdaktsütsü kü teinyaktsü shilem ka lir ta angateta itemi Aor aser Naga senso tajungtem den lemsateper.
Ao Senden-i yamala tesashi telemtetba agitsüsa akümba ya ni Naga Hoho nungi anenstu memulungba agi ta parnoki ashi. Parnokisa shia aruba agi, iba takangba ya Naga Hoho-i taoba mapang 2008 küm Rongmei nunger nem “Indigenous Naga Tribe” jenjang agüjang ta Nagaland sorkar dang shiti züluba ajanga lir. Naga Hoho-i mapang balala nung aiben yamaji masü, saka Rongmei nunger nem Garo, Kachari aser Küki kin tem nem agüstuba ama Rongmei nunger nem-a “Indigenous Naga inhabitants” jenjang agütsüyonga tai mali ta Nagaland sorkar dangi zülu ta khuli tejangja dena sangdongogo. Item atalokya-a-aliba mapang Ao Senden, Sumi Hoho aser Lotha Hoho Naga Hoho nungi atsüngtsü telemtetba CNTC senden ka nung telemtetba agiba ni meteta aru. Iba ama tongtibang telemtetba ka Ao Senden tapet sapang ka nung masü saka CNTC ama tanga lokti ka nung agiba yabo kanga temangmangtsü ka. Anungji ni ilonga Ao Senden office nung parnok Presidential Executive Council den 31st July, 2016 Mokokchung nung ajurutep. Iba mensem nung ni ashi, Ao Senden Naga Hoho nungi atsüngtsü lemteter sura, iba telemtetba yimjak nung mesangdong dangsa ni Naga Hoho President menden toktsüdi. Idangji parnoki kü dang na anentsüji nukjidong masü aser iba telemtetbaji agia mali anungji na manentsüla aser Naga Hoho-i tamalen sorkar dangi züluba shiti meyipa magi tashi dang Ao Senden Naga Hoho nungi atsüngina atatsü ta ashi. Anogo ishika tsüngda nung Ao Senden Naga Hoho nungi anenstu lemtetba osang sangdong. Ano mapang tatsüka lir ni Naga Hoho President menden anogo tenet nu tsüngda tokjang ta 16.11. 2016 anogo tetuyuba agütsü. Anungji anogo tenet mabensadang Naga Hoho Presidential council senden 21.11.2016 amendang ni anentsü asüngdang, saka aji lokti-i khuli tejangja kar agüja-a ni manendaktsü aser maneni President inyaktsü nungloktsü.
CNTC aser yangji dena aliba senden palala-i maneni Naga Hoho shity sorkar dangi züluba meyipa agitsü takangba ret reta liasü nungji Naga Hoho-i sorkar dang shity ka (NO.NH/Corr-04/2013-18) ajanga taoba shity to meyipa agiba osang agütsü.Naga nunger kin palala tsüngta teputep mesamatsü meji nung Naga Hoho aser ni akokba tashi Ao Senden aser tanga CNTC den tanglokba sendentem den tangatettep kati arua amalitep alitsü asoshi temerangdangba aika liaka, tatem nung Ao Senden-i ni Ao senso nungi jendokba osang kakettem nungi angashi. Ni amanger,iba teinyakba ya Ao senden aser tanga CNTC den aliba loktitem taginuba ataloktsü asoshi inyak.
Aor lokti tulutiba-i koba mapa kü dak inyakogo, iba ya alia oa inyakba ka lir ta ni retreta amanger aser teküboklen agüja aliba onuktem yagi kü tebilemdangbaji jangjatsür.
1. Rongmei kin dak sendakba onüktem ashoshi kechisa Naga Hoho aser Nagaland sorkar na tsüngda o belentepogo, item ya 2008 küm ni Naga Hoho President masüdang inyakbatem lir.Tesülen kechi osangtemsa belentepogo aji ni kija-i masü saka Naga Hoho lokti telemtetbatem inyakba lir.
2. Kodang ni Ao senden dang ni Naga Hoho nungi anendi ta ashi, parnoki na anentsü kecha menüngdaker ta ashi. Oda Naga Hoho-i sorkar dangi züluba shiti meyipa magi tashi Ao Senden Naga Hoho nungi anena alitsü ta kü dang ashi.
3. Kodang Ao Senden-i kü nem Naga Hoho President nungi anentsü anogo tenet atakzüktsü, ni anentsü osang Naga Hoho nem agütsü. Naga Hoho Presidential Council senden ka mena ni anentsü memela. Ni loktiliba koba nung ni President menden nung mena lir, iba lokti temzüngtem agi alena lir asünung item ozüngtem aser telemtettsüba angatsü kü teinyaktsü lir.
4. Ao Senden-i iba ken-o asoshi kü tebilemba aser kü jenjang shidangtsü asoshi kodanga maongka magütsü. Telemtetbatem ajak osang kaket mesüra shiti ajanga dang kü nem metetdaktsü.
5. NTC aser CNTC nung Ao Senden atentsü asoshi Lenla Mungdang jazüka telemtetba agiba ngua aruogo saka Ao Senden Naga Hoho nungi atsüngintsü indang telemtetbabo Dimapur nung CNTC senden ka nung Ao Senden tenüng amer ishikati Ao Senden ketdangpur aser Presidential Executive Council majangi agiogo.
6. Tatsüka asoshi inyaka aliba Ao Senden Acting President aser General Secretary nati senso ka jendoktsüsa telemtetba tulu agiba yabo kanga tebilemdangtsü onük ka lir aser iba ama inyakyim ya tematiba jenjang nung aliba lokti ka inyakyim bangdak anema aibelenba ama bilemer.
Tamalen agüja aliba onüktem ajakji ken asoshi inyaka aliba (Interim) Ao Senden-i ni Ao senso nungi jendokbaji Aor ajaki molungra aser Aor sobaliba agi mela-a aliba inyakyim ka süra, ni iba telemtetba agizüktsü molunga lir. Ajisüaka ni yabo shinür; Ao Senden nem Aor senso ka par yimer-ia memeteti mesüra temelaba magi-e senso nungi jendoktsü tashi, otsüla obula nunger tensa nungi lireplirepa amshia aruba Aor sobaliba-i mela-a ali asü mali ? Aroka ia bilemdanger Aor senso tajungtemi iba tatalokba atema yimjak nung pei tebilemba melemsatepra, Aor asoshi tentet tasen ka tenteter asütsü aser tarutsü putu asoshi tatalokba balaka asütsü ta bilemer.
Ozü Yimjenkimong sensopur ajunga aser ano talisa Putu Menden-i kü senso jenjang tang tashi wazüka yutsüba dang masü saka iba ama timtem tensa ka ajangdang ni aser ozü kipong metoktsü-i amalitepa teyari agütsüba asoshi tepelaba tulu metetdaktsür. Ano ajak dang tongtipangsa, Aor aser Naga senso kwikati aria bilem tulu sayua aser taremzük agi amalitep mesamadaktsüi teyari tulu agütsüdagi parnok ajak dangi ozü kibongi pelaba metetdaktsür.
Tsüngremi Naga kin maneni moajangma.