Asenok ajak tesayurtem lir

Tekülem Kolosi 3:12-25
Shisatsü ajak nung medemer o medemer na tenüngsang ken aser temeshi ken aser tanela ken agi sayua ajungshiang aser nenok temulung nung taochi ken agi Tsüngrem dang tenang. – Kolosi 3:16
Yisu sülen anidaker shia taküm tepiyong tangazüker dang masü, saka tangar dang sayurtemi asütsüla. Tsüngremi Israel nunger teburtem aser tetsürtem dang parnok chirnurtem dang Pai melaba ozüng kümdanga sayutsü ashi. Mathi kaket tenyaba mapa tuluji pastor aser tesayurtem asoshi dang masü. Efesa aser Kolosi shiti nung tanelaren aintsü asoshi arogo telungjem nung züngsem ajakji tesayur ta zülu.
Telok tekülem nung asenoki kati ka dang sayur. Lai nungi lemsateper, committee nung, lanur telok nung kati ka dang sayur. Ano asenoki takok tamakok anguba lenmang ajanga sayur; asenoki inyakba lenmang, asenoki bilemba aser asen tejangraba arishiba lenmang ajanga sayutsü akok. Atangjichila nung asenoki kar dangbosa sayur.
Tanü asenok dangi arurtem dang nai aser ni kechi sayur? Lanurtem nem asenok tanelaren kechi tesangwa agütsür? Taintem den inyakdang asenoki parnok lemang nung tashi itdaktsür asü, tezüdangdaktsür?
Asenoki O aser temeshi mapa ajanga sayutsü Tanela Temeshi dak metalokdi (Lk. 12:12) idangji asenoki tangar dang sayutettsü. Aser kodang asenoki Tsüngrem O jembitsü taküm kuli nung tamakok ngudir, tangar tashi itdaktsütsü mokoklir, majungshitet lir, mesüra Tsüngrem temeim lemsatepba nung tamakok ngudir asenok Yisu Khrista dak reprangdi kechiaser Pa tesayur tulutiba dang masü, saka Pai kangki nung asen tamakok ajak aben. Pa dak asenok temenen tatokba aka aser apusotsü asoshi tashi tasen angu.
Temeim, tangar dang sayutsü onok tesayur tajung kümjang. O aser mapa nung Ne temeim lemsateptsü yariang. Amen.