Asenok anema o mebendangtsüsa asenoki o mebendangli

~ L. Kika Pongener.

Mathi-7:1-3. Nenok anema o mebendangtsüsa nenoki o tebendang. Kechiaser kechi obendangba agi nenoki o bendangdir nenoka yamaji o bendangtsü, aser kechi touzükba agi nenoki ozüktsüdir iba kasa nenok nema ozüktsütsü. Asen mimchir dak aketba jakla rongnung ajak dang tamajungtiba kaji, asen sasa asen obendanger akümba ya asütsü. Asenoki aiben tang asen tashimait mereprangi tangar tashimait dak dang rangloker aser o bendang agutsür. Alima nung alir mimchir ajungai, shinga-ia pei tashi-maitba taibo mangur, pei aibelenba-bo mereprangteter aser mezüngshir, saka pei adianu, pei medemsor, kulemi tenzüker, kulemi lisemertemi aibelenba mesura tai tila-tiri inyakba-bo kanga suoki yia aitsür aser züngshir. Saka asenoki kodang osangtajung Mathi-7:1-2. nungji züngdangdir, “Nenok anema o mebendangtsüsa nenoki tangar o tebendang” ta shia angur.
Ano aji tang masü, “Kechi o bendang agi nenoki o bendangdir, mesura kechi touzük agi nenoki ozüktsüdir, iba kasa touzükji nenok nema ozüktsütsü”, ta jangja-jangja shia angur. Tetezü, kechi koda aseni tangar aitsüa o bendang agutsür aser tatakzük atakzüka ozüktsür, ajioda asen anema-a o bendangtsü aser atakzüka ozüktsütsü ta ashir. Aji oda, tanü aseni kechi mapasa inyaka ayur, mesura kechi ken o-sa jembizüka ayur, aji asüng asen atema inyaka aser jembizüka ayur ta laishiba jagi ashir. Ano Mathi-7:3-5 tashi nungji kodang züngdir, “Kechiba nai pei tenük nung anak tuluji mongui yur ne adianu tenük nung anak tilaji ajir? Mesura ne tenük nung anak yur ni ne tenük nungi anak endoktsüdi ta nai ne adianu dang koda ashir?
Anemsuba, na pei tenük nungi tamasa anakji agiteta endokang aser idangji ne adianu tenük nungi anakji endoktsütsü nai akoktsü. Iba alima nung alir mimchir shia dak tashimait ka-kabosa alitsü, shingaia nibo kecha nunga tashimait mali ajak shidak dang inyaker ta meshitettsü. Nisung shia-i langka-ka nungbosa aibelena inyaktsü aji mimchir yimya. Rom-3:23. nungji züngdangra “Kechiaser ajaki temenen mena aser Tsüngrem sentsüwangshi matonger”.
Tsüngrem dak alema anüng küpok nisung shianga tetemsüba mali. Anungji asenok rongnung kati ka madak o bendanger mekümi kati ka nem tai tatok agütsüteptsüla aser temeim sayuteptsü kanga tongtipang. Mathi-5:38-41. nungji züngra, “Tenük melen tenük aser tepu melen tepu”. Saka ni nenok dang ashir tamajunger den terara; saka shibai ne tenibong tajichi nung mahdir pa tsütsü tabelenjia tendakang. Aser nisung kari ne supoksü aginura; pa nem ne süa agidakjang. Aser shibai na mile ka jajadaktsünür pa den mile anasü jaja-a oang”. Atangji, Israel nunger nem Tsüngremi Mosa ajanga agütsüba tejen yimsü ozüng nungbo, “Tenük melen tenük aser tepu melen tepu” ta agutsü. Aser yamaji tejen putu nungbo inyaka benshia arua liasü südi. Saka kodang Yisu Khrista alimai aru, pai iba tejen yimsü ozüng melena, tamajung melena tajung meyipa agütsütsüba yimsü ozüng agi melentsü.
Aji oda, Yisui sayuba, Khristan taküm ka dak akettsüba jaklaliro yimya shidakbaji ibaji lir. Yisui ashibaji shibai na anema tamajung tasa tapu tapu asa-a inyaker, mesüra taochi maket mapa tamajung jenti inyaker, parnok nem tamajung melena tamajung tagütsü, saka meyiper tajungang inyakang ta ashir. Alima nung mimchir taküm asünungji laishibai ashiba ama inyaktsübaji tebangi jembitsübo temela, saka mapa agi inyaktsübo kanga-sa tasak lir. Ajisüaka, laishibai ashir, “Nenok reshikangshirtem dang moajang aser atakatem tesü. Shinga nunga tamajung melena tamajung tagütsü. Kokrabang naibo nisung ajak den yimjung nung liang.
Temeimbatem, nenok sasa mang teyang, saka Tsüngrem ain adokba ata-a liang. Kechiyong Kibubai ashir, mangyangba kü meyong, ni shia agütsütsü” (Rom-12:14-19). Tsüngremi mapang tetemsü nung asenok ajak nem pei pei inyakba aser jembiba yari atakzüka ozüktsütsü. Alima nung asenok ya melentepa liyunga aotsüba lima nung alir. Putu ka nung kin kar mesüra, nisung kar ita-anü ama merena wangshi-wangshia alitsü akok. Ano kin kar mesüra nisung karbo kanga-sa tajemrepba tepetzük tia nung alitsü akok, saka ashiko tetibo yamaji malitsü. Anungji asenok jenjang junga aliba mapang, nisung ajak den yimjung nung alitsüla, ajak tsütsü saku-ku liteta, kechi mapa inyakdir inyak-aka aser kechi ken o jembidir jembiaka, kanga talangka shisadanga, tarutsü lia aotsü indang bilema, yimli-süa, inyaktsüla aser jembitsüla. Asenok alima nung ya arishia liaka küm tenem-ser metsü aser lir-anasü-ang alitsü. Anungji iba arishi tatsüka alidangji, kati ka den meimtepa, jungtepa, longjema, akümtsübutepa, tai-tatok agutsüteper, yimjung nung alitsü kanga tongtipang. “Kechiaser tamajung inyakertem leptoktsü; Saka shiri Kibuba asoshi atadir, parnoki alima senmangji amangtsü. “Saka ajemaluri alima senmang amangtsü aser yimjung tulu nung pelateptsü” (T.Ken-37:9-11). “Kibuba dak amangang aser tajung inyakang; aji sura na ali nung taso shia alitsü” (T.Ken-37:3). “Tamajung nungi pila-ang aser tajung inyakang, sura na tatem makai alitsü” (T.Ken-37:27).