Asenok arok oshi

Alima nung Nagaland mesüra Naga nunger ta asüba ya tesüngmangtsüka lir, kechiyong asenok Naga nungertem ya kinbo ka dang saka oshibo balala. Aji oda, kodaser oshi balala purtem kin ka asütsü ta asüba tasüngdangba nung tanü lanurtemi telangzüba bushitsü kanga nüngdaka kümogo. Ano, tesüngmangtsü kaji, Naga nunger ta asüba purtem rongnung kin chanu aika lir aser item kin chanu shia nungji yimtsüng shia osü dang masü saka oshi dena balala jembiba kin  aika lir, ajisüaka ajaki Naga nunger a ta asübaji agizüktetter aser külemi putepa alir. Ibajiang tesüngmangtsü taketba lir. Asenok aikati Naga nungertem rongnung meputepba indang jembir aser aji tiyazü masü saka tangar kin ka aser oshi ka ta alirtem den medemdangra asenoksa teputepba ta shitettsüsa asenoki reprangtettsü. Ibaji tia junga asenok Naga nungertem rongnung angatettepa jembitsüsa tangar bendanger oshi  aruba ajanga asütsü. Tamalenbo asenok tsüraburtemi meranga inyakba ajanga Naga nunger kintem aikati Ao oshi kanga sapua jembia liasü, anungji parnok o parnok na tsüngda jembidanga Ao oshi agidang jembia liasü, saka asenokia dena asen Ao oshi mesapui akümba ajanga tangaria mesapui kümogo. Aji oda, Naga nunger kin shinga oshiia Naga nunger ajak oshi küma jembitsüsa meinyaktet nungji meilongi-meilongi küm ishika tsüngda nung Naga nunger oshiji English aser Nagamese na kümadokogo. Ibayongji, tanübo Nagaland Legislative Assembly nung English o Nagamese na dang jembir aser ajaki angatetter. Tatishitsü agi, Naga nunger oshisa süaka, state assembly nung Ao oshi jembi nunga aikati mangatettsü, anungji temeyiper nüngdaktsü saka English aser Nagamese oshi atemabo iba tebilemtsüji mali. Ano, tanü putu nung Naga nungertem rongnung English dang nungi Nagamese-ang tesapuba sapua jembir. Aji oda, office nung, tenla kidang aser kima yimdong nung lanurtemi balaka, Nagamese ya tanganütsüka kanga junga jembir. Joko, arogo tsütsüa Nagamese Baptist Arogo Mungdang tenzükogo aser Nagamese agi Laishiba meyipogo, ken kaket adokogo aser sayutsüngia Nagamese asür. Ajisüaka, jungjunga bilemdangtsüba kaji office mapa zülushiraba nungbo Nagamese mamshir aser school nunga Nagamese magir, anungji Nagamese ya yimten, arogo aser lokti senden nung jembitsü melayonga, ano Nagamese ya Naga nunger official oshi ka amabo mekümi lir. Ajisüaka, Nagamese medeni Naga nunger jembishinü nung mangatettep aser temulung melemtep tulu adoktsü ana nung lir. Joko, Nagamese ya asen oshi masü ta mekümtet, anungji Naga nungertemi jembiba oshisa asütsü.  Ajisüaka, Naga nunger arok asoshi oshi ana alitsü, kaji English aser ibaji tejembia jembitsü aser tezüluba nunga amshitsü saka Nagamese-bo tang amai officially jembitsü akok saka officially züluba nungbo mamshitsü. Iba jagi tang asenok rongnung Nagamese oshi ya Nagaland nung ‘official language’ amshi nunga koma süla ta jembitepba  tebilemtsü ya akoktsü südi ta bilemer. Nagamese o English na prongla ya asenok asoshi bendanger oshi, ajisüaka English yabo alima ajunga nung jembir asünungji iba oshi jembiba nung tajangzük lir. Ajisüaka, Nagaland nung English kija jembia alitsübaji tasak asütsü, anungji Nagamesea ashitsüla aser jembitsüla. Ajisüaka, ano English o Nagamese na kisüng jembir pei tetsü oshi mejembitetra, iba jagi Naga nunger agi Naga nunger memesük mesüra Aor agi Aor memesük kümadoktsü. Nagamese jembiba agi tsümar amai küma aotsü masü saka pei tetsü oshi mejembiba agiang tangar küma aotsü. Atangji, Nagamese ya Nagaland adena orrbo takidak makatsü, kechiyong ibai tsümartemi yangluba oshi masü saka tsümar o aika meyoktepa asenoki yangluba oshi lir. Oshiji angatetteptsü atema dang lir, anungji kechi oshi jembidir jembiaka angatettepra ojang, saka pei tetsü oshibo mamai jembitsüla. Atangji, English ya Naga nunger ‘Official language’ anungji arok oshi asütsü akok saka bilemdangang, English-ji kodanga Naga nunger oshi masütsü aser Nagamese-jia kodanga Naga nunger oshibo masütsü. Tenapronglaji makaba agi apua bener arua amshir amai dang lir.