Asenok asütsüla

Küm shia alima ajunga nung, tanü amai,  Khristantemi kümtetdakba Yisu Khrista asüba anogo bilemteta ‘tajung Hokolbar’ anogo amonger. Aji oda, Yisu dak amanger shiai Yisuji alima temenen purtem kümzüktsü asoshi kangkidong nung angenloka südaktsü ta meteta liaka, küm shia Yisu asüba anogo bilemteta amongdang, kechiba Yisu Khrista asü (?) ta peisasa pei mulungjang nung asüngdanga telangzüba tejangjangba bushia angatettsü merangtsübaji kanga tenüngdaktsü lir. Kechiba Yisu asü? Pa masüyonga Tsüngrem ain aser taochi agi temenen purtem kümzüktettsü masü no (?) ta asenoki bilema alitsü. Aji oda, Yisu Khrista kangkidong nung angenloker külen, Yihuda nungertemi Pa atalaja ashi ama, Pa Tsüngrem chir asünungji, Pai Pasasa kangkidong nungji mesüi kümzüktettsü amai asenokia bilema alitsü südi. Pa den külemi angenloksang ashir-auer kati Pa dang ashi ama, Pa Khrista süra pa den külemi angenloka aliba nisung tamajunger anajia dena kümzüktsüla ta asenokia bilema alitsü. Atangji, kangki nung angenloka aliba nungi Yisui Pasasa Pa taküm mesüi kümzüktsübaji melarmelar. Yisu atema Pasasa Pa kangkidong nungi kümzüktsübaji, Lazar tasü nungi shia arudaktsüba dang nungibo temelaba aser nükpoker ngudaktsüba aser temenen tanüla agi pua alirtem salatsüba mapa dang nungi tezübaba asütsü. Ajisüaka, kechiba Pai Pasasa Pa taküm kangkidong nung jagi mekümzüktet? Asenoki kodang iba tasüngdangba langzütsü asoshi Tsüngrem dang nungi shisatsü meshia sarasadema Lai bushidir, idangji dang Yisu asüba nükjidong aser Tsüngremer sentong angatettsü. Yisu Khrista asütsü mapang anasa arudang, Pai par nütsüng Filip aser Andria na dena lia Pa asütsüba nükjidong indang ashiba Osang tajung Yohan tapu 12:24 nung shia angutsü. Yisui ashi, tsükjang ka ali nung tsüker mesüra pa kija dang alitsü saka tsükjangji süadokra, iba nung jagi ano tejang jenti atangtsü. Aji oda, alima meimchirtem kümzüktsü asoshi Yisu asü aser Pa asüba ajanga jenti kümzük. Yamaji asenok nisung shia taküma tejang atangba tsükjang amaji akümtsü asoshi Yisui Pa amaji südaktsüner. Yisui mapa agi inyaka sayuba ozüng kaji tejang atangtsü atema asütsüla. Aji oda, kodang asenok taküm nung Yisu Khristaji Kibur Kümtetdakba ta agizükdir, idangyongjisa asenok temenen taküm samar aser taküm tasen akümer ta Rom tapu 6:6 nung shia angutsü. Tetezü asenoki kodang Yisuji asen taküm nung Kibur ta agizüker, idangji asen taküm nung tashimait aser mokokmein temenen jenti Pa den külemi angenloker. Asen taküm nung Yisu Khristaji kibur ta magizük dangbo asenok tebang temeli, jakla liro aser achiajem nung mazüokba taküm liasü, saka kodang asenoki Yisuji agizük, item tamajungtem ajakji süa adoker aser asen takümji nisung tasen akümer ta tanabuba Korint tapu 5:17 nung ashir. Aji oda, Khristan akümyonga asen taküm nung item temenentemji mesüdaktsüra, asen takümji tejang atangba taküm ka masütsü. Tejang atangba taküm tetezü asen takümji tangar atema temoatsü taküm ka asütsüla aser asen taküm ajanga jenti pur Yisu ajurutettsüla. Asenok Khristanbo Khristan saka shi azü aser ain apong mazüoktetra, iba jagi nisung aika Yisu majurutettsüa akok. Asenok tebang temeli mazüokba aser asen kija ajungtsü bilemba temenen asenok dak mesüi taküm lira, iba jagi asen takümji tangar atema temoatsü mesütettsü. Aji oda, asenok taküm maparen kar nung ajemalu mesütetba ajanga mesüra tasü maremba ajanga kinünger aser medemertem jashidakja alitsüa akok. Yisuji kangki nung angenloktsüla aser yamaji asenoka Pa den kangki nungji asütsüla ta Laishibai ashir. Kangki nung Yisu asüba agi asenok tekümtet angu ama, asenoka Pa den kangki nungji asü nung dang tangar atema tajangzük asütsü. Yisui ashir, tejang atangba taküm asütsü atema asütsüla. Yisu asüba agi asenokbo tekümtet nguogo saka asenok asüba ajanga mesüra asenoki aremzükba ajanga asenok dak nungi tangar temoatsü angur asü mangur, ibaji kanga tongtibang lir.