Asenok azü nung Naga nunger lir : Dr. Shurhozelie

Senapati (Manipur), June 28 (TYO) : Putu 17 buba nungi British nunger yimsüsüba mapang parnok ajung asaa administrative units tentetbaji Naga nunger atema tesasatsü lir, ta Naga People’s Front (NPF) president Dr. Shurhozelie Liezietsu-i ashi.
“Parnoki temulung nung tanga kecha mebilemi iba mapa inyak asütsüa akok aser kasa mapang nung asen oboula nungertemia item inyakyim ajanga tarutsü Naga nungertem timtem ajurutsü ta kecha mebilem asütsü akok” ta Manipur kübok Senapati nung NPF Manipur state Unit sentong ka nung Shurhozelie-i ashi.
“Tanü asenok Nagaland state ka, Manipur nung tesem tulu ka, Arunachal Pradesh aser Assam nung tesem kar aser ano Myanmar nunga tesem tuluka lir. Ajisüaka, Myanmar ji linük balaka lir, anungji tanü asenoki olemtepba arrtsü onük nung ibaji medensemer.  Asenoki kodang ka küma longjemtsü indang jembidir Nagaland, Manipur, Arunachal Pradesh aser Assam nung Naga nunger litsü ajak dena lir,” ta NPF president-isa metetdaktsü.
“Iba tebilemba ya asen kidanger kar atema meputep, saka ochibaji Naga nunger ajak kibong ka nungi dang lir. iba asen asen tasodang nungi temeten lir. Asenoki shimba masü saka azü ajanga asenok Naga nunger lir” ta paisa shisem.
Nagaland Legislative Assembly-i pezüben tashi (December 12, 1964, August 28, 1970, September 16, 1994 aser December 18, 2003) telemtetbatem agiogo. Ajisüaka asen kidanger state temi anema noktakba ajanga telemtetbatem mapa küma meinyaktet. Onoki item onük kanga junga shisadangogo aser litsü ka küma melongjemtetaka, tangatetba nung ka küma longjemtsüla ta tangatetba nung Manipur state nung NPF telok tenzük, ta Dr. Shurhozelie-isa ashi.
Linük nung ozüng ajanga recognized political party kaji tadener dang lira, linük kübok tesem mashii ka nung tenzüktsü akok ta temelaba agüja lir. Iba tangatetba nung NPF-i Manipur nung ‘an tebong’ telok tenzüktsütsü lemtet. Naga nunger tsüngda tesentaktep tajungba ayutsü maongka agütsütsü nükjidong nung Manipur nung NPF tenzük, ta paisa shisem.
May 28, 2011 nü Manipur state nung NPF telok saya.
Manipur nung 11 buba general election agitsü mapang tonga arur aser iba asoshi mapa inyaktsü atema ita tenet jungmejung ka dang anünga lir. Anungji, mapang meindoki tang nungi teinyaktsütem inyaktsüla. Ibobi’er lenisüba nung telok balala tsüngda telemsa yur mapa inyaker aser iba ajanga teloktem tsüngda tesempatep adokogo, ta NPF president-isa ashi.
School education & SCERT Minister aser NPF Manipur state unit atema cabinet incharge, Yitachu-ia o jembidang ashiba agi, democracy nung yimten telok kaji lokti ajanga nungiter aser yimten sabang nung asen temeten, asen alizüng aser asen nükjidongtem atema mapa inyaker.
Manipur state nung NPF tenzükbaji state nungi langka bener aotsü atema masü saka state nung nisung kar indang temeten kümzüka ayutsü atema tenzükba lir, ta Yitachu-isa ashi.
Nagaland nung taruba election nungjia tang teinyakdak NPF president Dr. Shurhozelie Liezietsu aser tang teinyakdak chief minister T.R. Zeliang na lenisüba kübok NPF-i takok tulu angutsü, ta paisa metetdaktsü.
Iba sentong nung NPF Manipur state unit president, N. Awangbow Newmei-ia o jembi.