Asenok gari raksatsürtem

Tanü asüng maparen agi nüngdaka akümba agi nisung aikati bank nungi sen apua gari alia amshir. Ajisüaka, mapang tatsüka tsüngda engine nung timtem adoker. Ibaji tanga kecha agia masü saka gari totzü ayokertemi gari totzü den kerosene meyokteper ayokba ajanga lir. Aji oda, kerosene agi gari totzü kümer litre nung sen 70 agi ayoker asünungji tayokertembo manger sangwa nung takar akümer saka gari amshirtembo kanga akoksadaktsür. Gari amshirtemji Chief minister-ba o Chief Secretary-ba nati anir District nung Deputy Commisioner aser police tanishirtem den gari akartem ajak dena lir. Anogo shia item gari amshirtem gari nung gari totzü ayoker tzümartemi kerosene enoktsür. Aji oda,  gari totzü enokdak asenok gari nung kerosene enoker odaktsüdang totzü ayoksang malik (kibur) jagi asenok koda menüja alitsü ta tezüdanga bilemer. Gari totzü ayokertemi iba amaji inyaker ta ajaki meteta liasü saka shingaia gari totzü den kerosene meyoktepa inyakbaji mangu, anungji kuli mali asü. Ajisüaka, tang ACAUT telok ajanga Dimapur nung iba ama nübortem külakokja takar akümtsü merangba tzümar nisung pezüi inyakba putetbaji Nagaland nung gari amshirtem ajak asoshi teyari tuluka asütsü. Iba ama nübortem ashiokja takar akümtsü merangba nisungtem dangjibo gari amshir ajaki temenok meshinütsüka bilemer. Aji oda, parnok dakjibo ozüngi melaba ama inyaktsüla aser parnok meyong totzü ayokdakji shibangtsütsüla. Atangji, totzü ayoktsü anguba kiburtemji Naga nunger dang asütsü saka Naga nunger kiburtem jagi tsümartem nemji dang inyakdaktsür aser ita shia sen terara meshia agir. Iba dangji ‘benami’ ta ajar. Tetezü kibur melena tangar nem inyakdaktsüba. Ibaji ozüngi memelar. Aji oda, gari totzü nung kerosene enoker ayokba aser Naga nunger tenüng nung tsümartem kibur kümer inyakba mapa ajakji ozüng anema lir. Ajisüaka, asenokbo pelaa dang lir, kechiyong gari raksayonga yangluteter, anungji asenok gari nung kerosene enoktsüba agi asenok timtem takoksa angubajibo asenoki aremzükteta lir. Ashiko, taoba mapang nung iba yimobilem nung züluba ama, asenok asoshibo gari nung kerosene enoktsüba, nashi mamatzü nung tzü enoktsüba, ak nem metsü tzü kangshia jemdaktsür ayokba, nabong shi nung tzü keter ayokba, shi tamajung ayokba, supply jang dokan nung sen tasak agi aliba aser mapa meinyak ser sen agizüka agiba mapatem ajakji tanü asüng sobaliba tajung ka amai dang agizüka alitsüa akok. Asenok ya yi mesüra drugs agi meseper kazürtemang mesük. Asenok nüchi masü. Asenok yamaji külakoktsüyonga kecha jashia mali. Item ama nübortem ashioktsüba mapajibo tema aser telong government shingaia mebushir.Tanga lima ka nung iba ama mapatemji putet asübo nübortem ajaki ola adoker lila. Ajisüaka, nübortema ajemajema dang lir. Lokti tentettemia kecha balaka jashia mebilemer. Aji oda, asenok kanga pezüpezüa kümogo. Ibaji tanga agi pezüdaktsüba masü saka tsümartemi asenok gari nung kerosene enoktsüba nungi anguba tajangzük to kar nem shilem tilala lema agütsüba agi pezüdaktsür. Ajisüaka, Naga nunger shitakba sensosangertembo sen agi pezübelema mekümdaktsütsüla. Nisung taküm amtsük kija agibo taküm melitettsü ta asüba ama Naga nunger sen kija agibo taküm malitsü. Ochi maden aser mapa meinyaki anguba sen agibo taküm dang raksatsü. Ibaji shitak asü masüar asenok kibongtem reprangdangyonga oang. Joko, asenok ya tzümartem nungi commission sen tera agir asenok külakokdaktsüba putu masütsüla. Tsümartem dang kerosene sen tasak agi alia gari nung enoker jajabaji asenoki asenoksasa akseta bilemdi aser tang nungi danga yamaji mesüdaktsüli.Parnok nungi shishilembaba mapaji melenzüka asenoki shitak inyakdi. Aji oda, totzü, seret aser chiyongtsü ajung majung tendangtsü purtema alima nung lira, parnok alibaji nübortem nem metetdakjang aser senso tajung ka ama pei nübortem meima pei tata shilem shitak inyakang.