Asenok ishika dang akümtsü !

Yaküm 2021 küm tatembanglen India tatar hoho anaprongla nung election nung vote enoktsütsü pur tenüng züluokba electoral roll o Aadhaar card na sendakteptsü telemtetba agiba yagi, asenok Nagaland nung alirtem dang masü saka India nung vote agütsütsü pur tenüng electoral roll nung züluoka alirtem aika ageintsüsa adoktsü, anungji vote agütsütsü pur ishika dang akümtsü. Atangji, alima nung tzüa masen shitak inyaktettsüsa mapa kata mali, kechiyong shitaka aser meshitak akümtsüba ajakji nisungisa inyaker, anungji Aadhar card amshia electoral roll nung nisung tenüng züluokbajibo noklang nung noklang shitak asütsü ta mali, kechiyong nisungisa inyakerji Aadhar card dena taila agizüka PAN card yangluba otsüa angashir. Ibayongji, electoral roll shitak küma yanglutsü asoshi tatartemi Aadhar card number amshia nisung tenüng jangjar külen dang electoral roll nung pa mesüra la tenüng züluoktsü ta lemtetbajia nisung aikati aitsür aser iba mapa jagi tajung dangbo tamajungang teimba ataloktsü amai bilemer. Ajisüaka, nisung ka pa mesüra laji shitaka ta jangjatsübaji, tang tashibo, Aadhar card amabo maka, anungji Aadhar card amshia nisung jangjashir külenang vote agütsütsü purtem tenüng electoral roll nung züluoktsübaji tim mapa ka tenzüker asütsü. Asen lima nung balaka election merüka agitsü indang kanga sashia jembir aser arogoi anir kanga meranga inyaker. Iba ama election merüka aginüba mapang linük ajaklen voter ajak pei Aadhaar number agi jangjashitsü lemtetbaji Tsüngrem nungi teyari yok ama asütsü. Atangji, asen lima nung dang masü saka tesem ajaklen election mapang tashiyim aser sübokrem amshiba osang angashir, ajisüaka election timi agitsüba yabo asen lima nung jembiba ama tanga tesemtem nungbo kangabo mejembir. Ibaji, ashiko, tang state-tem nungbo asenok amai alima nung maliba nisungtem tashibo electoral roll nung züluoka malitsüa akok, mesüra asenok ama nisung kasa ser tesem aika nung tenüng züluokdakja malitsüa akok. Ibaji dang masü saka asen lima nung election mapang kibong ka nungisa tsürabur khen, tanurtem khen aser kibong ajunga khen ta pei vote ayokba amabo meyoki alitsü. Aji oda, asenokbo senso candidate shimtsü asoshi jelia election tilaka ka agimatsü, idangji lenirtem ayoktsü aser ano kasa vote-ji shitakba election aru dangbo jenjang tur ayoktsü ta senso candidate shimtsü maparen tenzükba anogo nungi vote magütsü tashi tatar yimsüsür aser nütsüng nübo ta mali , ajak yoktenyokraba oset ama ka dang kümadoker. Iba jagi kasa linük aser kasa temzüng kübok election agir süaka, tanga state-tem dang nungibo, asen limasa tejanaba aser memerükba küma asenoki election agitetter. Ano, asenoki election nung ochimashi mapa ka, ochishia inyaker amai inyakba mapaji electoral roll nung nisung tenüng meshitaki talila züluoka alibatem raktepba ya asütsü. Ibaji shirnoki kokdir, item meyong vote agütsütsüba kaket ajak ketdangsertem nungi meshia bendena ayutsü aser vote agütsütsüba anogo nung item taila tenüngtem tenüng nung nisung kari ajentsü. Aji oda, asen lima nungbo election anogo nung proxy vote ajenertem-ang nokinketer ama tushia amshiba asenoki angur. Ano, tesem kar nungbo yimten telok-tem rongnung tangatettep nung tiyazü nisung tenüng electoral roll nung enoka alirtem proxy vote-temji alemtsü. Meraratepi tangatettep nung proxy vote alembajiang asenok asoshibo ochi aser teindan g mapa ta agizüktetba tashi nungjibo asenok shisatsü aser tangatetba mashileni talangka ogo ta bilemdi. Ibayongji, meshitak dang shitaka ta ajar aser tanak dang temesünga ta marendaki shitettertemji asenok kümogo. Asen lima jungnüra iba mashilen lenmang nungi shitakleni meyiptsüla. Joko, tsüraburtem asoshibo yanglushitsü menur asütsüa akok saka asen chirnurtem danga pei lima aser pei mapa agi nümadanga lidaktsünüra, vote sen agi ayokba aser aliba, senso candidate shimba, sen aa tangar vote enoktsüba, proxy vote lemsaa enoktsüba, town nung alirtemi yimtaklirtem mesüzüka taküm raksatsüba aser yimtaklirtem election lu yima yur town-len jajaba mapatem ajak anentsüla. Joko, Aadhaar amshia electoral roll merüktettsü apusorji, asenok constituency ajak nung vote kanga ishika dang akümtsü. Ashiko, asen lima nungbo district karbo constituency ka asütsüa metemsüi akümtsüa akok. Alima nung alirtem ajak temenen nisung, Tsüngrem aser nisung tsüngdang kata temeshiba aser tetemsüba mali, ajisüaka alima nung meyazüi shitak indangindanga alitsü merangba nisung o kenyongi tiyazü aser ochimashi mapa inyaka alitsü dang bilemba nisung na tsüngdaji tepila talangka lir. Aji oda, asenoka shitak melitetaka, shitak alitsü merangertem telok nungji danga adentsüla.