Asenok jajatsüba lenmang

Majung asütsüa akok saka Nagaland nung asenok jajatsüsa gari lenmang aika yanglua lir, iba jagi timtemakasa shilumanem aser nüngdak mapang nung tadongtsü kabo tonga oli aruli ta senzütetter. Ajisüaka, teti timtem ajuruba kaji Nagaland nung alirtem aika Assam majangi senzütsüsa lenmang temetong tajung yanglua makaba timtem ya asütsü. Nagaland den artsüsa alir Assam nungertemi kenü dang mokdang nung asenok tounüleni moutet timatemer. Iba ama timtem aser takoksa angubaji sen kümer sükdangra küm nung sen crore aika adoktsü. Aji oda, Assam majangi kecha mesütettsüsa aliba tetezüji asenok Assam nunger lar lir. Iba ama alar tia nungi nüchi küma litettsü asoshi Assam majangia Nagaland kübok aliba yimtitembo ka nungi kati sademsadema otettsüsa lenmang alitsüla. Iba rongdak nüngdak reprangteta taoba küm asem pezü tejaklen nungi Assam majangi asenok Nagaland nungbo tadongtsü ka tonga jajatettsüsa tenemtsüng lenmang apitsü tenzükogo. Iba mapa nung talisa asenok Aor lenirtemi anir Naga kin tersangeri temulung kanga agüja inyakba nguogo. Iba jagiang tanübo gari jajatettsüsa lenmang merenemtetaka tetenzükbo tenzükogo. Joko, Doyang apu renem nungbo aser lenmang kilometer pezü pongoka metujungi alibaji atu nungbo, kopi melii gari senzütettsüsa lenmang renemadoktsüba tia nung lir. Iba lenmang kanga karaa renemnüba agi, Nagaland  Foot Hill Road Co-Ordination Committee (NFHRCC) nung alirtembo government nung alirtem dena aiben nüngsen agiba angashiogo. Iba amaji nübortem asoshi bilema inyakertemi angati nübo agi bendanga agüja inyakaka, mangatet kaji, aiben government nung alirtemi koba rongdak nüngdak aser kobabo rongdak nüngdakbo masü, itemji mebendangtetter. Ibayongji, tiyazü mapa inyakba nungbo sen crore aika endoker saka shitakba nübortem anisüngzüktsüba mapa nung endoktsübo sen mengutetter. Nübortemi dang masü saka government nung alirtemi angatettsüba kaji Assam majangi yanglutsüba gari lenmang ya gari kisüng jajatsüba lenmang masü saka nübortem asoshi temoatsü aser tajangzük aika keta lir. Kodang tenemtsüng lenmang ya yanglur Assam majangi senzütsü tenzükdir, tang asenoki Amguri, Mariani aser Silonijan nung chiyongba aser totzü enokba sen agütsüba ya Naga nunger nem agütsütsü. Aji oda, tenemtsüng lenmang tepiyong ya yimti ka ama küma aotsü. Item tesemtem nungji Naga nungertemi totzü enokdak aser chiyongdak lapoktsü. Idangjibo, Nagaland nung adokba rongsen gari nung oshir kecha timtem melii Dimapur railway station atongtsü. Iba ama mapa nungji Naga nunger lanurtem aika mapa angutsü. Iba mangdangji tang yongi lanurtem mulungjang nung asangsang ama ngua sentong yanglutsüla. Joko, tenemtsüng lenmang nungbo business ajak tsümartem  melen asenoki inyaktsüla. Iba teimla nung tenemtsüng lenmang ya memenui renemtsüla. Atangji, state government sentong nung iba lenmang ya Foothill Raod masü Express  Highway yanglutsü tebilemba lir. Tetezü state government-i tenemtsüng lenmang ya gari ana tsüitepshi lenmang tilaka masü saka kanga tuluka yangluner. Aji junger, saka tuluba atadangji tang inyaktur aliba lenmang aser apu ya renemtsüla. Asenoki Nagaland timtemdaktsübaji kechi terenlok mapa tenzüka inyakdir inyakaka mapang shitak nung renemtsü meranger masü saka merenemtsüang meranger. Iba jagi sen crore ter agi küm ana nung renemtsüba mapa ka crore noklang ka agi küm ter nunga merenemner. Atangji, iba jagi nisung karbo takar akümer saka nübortembo timtemdaktsür. Aji oda,  nisung kari mapang shitak nung mapa merenemtetba ajanga Delhi nungi sen bener arua mapa tasen meinyaktetba timtem aika tanü ajurudagi. Joko, tangbo item timtem ajakji kokteta Naga nungertemi Nagaland meima contract mapa inyaktsüla. Iba ama pei lima aser nübortem meimba shisatsü agi ano khen tenemtsüng lenmang yangluba mapa nung temulung agütsüdaktsünüa taoba hopta nung asenok iba osangkaket ajanga shisalemsatepogo. Lenmang tila dang nungibo tulubajisa tajungba saka tulubaji atadang tangsa tang tilabaji tama renem nungang tulubajia yakta renemtettsü.