Asenok küm 14 bubai ayaoker

Asenok ajak meyong osangkaket Tir Yimyim ya küm 13 junger ano küm 14 bubai mejaokdang onok asoshi tashi angudak tulutibaji iba osangkaket azüngertem ya lir. Ano, iba osang kaket azüngertem rongnungsa süaka tetenzük dang nungi tang tashi iba osangkaket azünger aika lir aser item rongnung jagi nisung aikati inyaka aotsü lenmang tajungba sayur aser aibelendang metongshitsür. Ano, tazünger aikati Olemsabang, Koma süla (?) aser Lili nung shilem tajung agiba ajanga iba osang tabensaba kümdakja takok ngudaktsür. Ajisüaka, taoba küm 13 tashi inyaka arudang onok tsütsü mekokmein aika onokia onoksasa putetter. Item rongnungji ojang zülumen kasasa liromedema mezülutetter, anungji aiben ojangbo kasasa ser nung zülumen (spelling) balala nung angutsü. Ano, khenkhenbo oren yangluba nunga azüngyonga saksaka angatettsüsa mesüra merangdangyonga mangatettsüsa zülubatema ataloker. Ano, khenkhenbo anogo tai ajenloka alir aser ano khenkhenbo tapak karbo kecha ajenloka mali tazüng ser tazüngertem ket atongba osanga angashiogo. Item tashimait, menendak aser tamakok mapatemji tazüngertem tsüngdang taaktsüka lir. Atangji, onok tamakokji aji dang masü saka aika lir, ajisüaka item tamakoktemji tazüngertemi aremzüka Tir Yimyim maneni jangrabangraa azüngba agi onoka aibenlenyonga maibelen ama aser tamakok aliyonga mali ama nümadangdanga küm 13 tashi kenüamati iba osangkaket ya adoka aruogo. Iba atema Tsüngrem tenüng asanger aser tazüngertem ajak dang pelar. Joko, küm 14 bubai ayaoka ia tain akümdang khureta tuluba aser nüngdaka teimba akümer, anungji ano temerangba aser tenendakba inyaktsü kanga nüngdaka kümogo. Idangji, ano tazüngertem nungi tajungshi, temetongshitsüba aser teyari kanga nüngdaktsü. Aji oda, kodangsa, Tir Yimyim nung tai mesüra aibelen ka danga reprangtetdir, yabo yutsüdi, kecha masüar odang meshii toktsüdi mesüra parnoki jashitsüa akok, anungji meshili ta mebilemi nguliyongi jet ta ashitsüla. Ibajiang asenok osangkaket ajungtsü asoshi mozü aser teyari tajungtiba asütsü. Onoki inyakner saka meinyaktetter ta anendaka akaba mapaji onoki Tir Yimyim ya tang adokba dang nungi tapak teimba nung adokner aser ibajia color nung adokner, ajisüaka madoktetter. Ibaji asenok ajak asoshi khuret ama bilema Tsüngrem dang shidi. Onok taginüba aser teyongyabaji Nagaland nung Aor anogo shi adokba osangkaket ka color nung adoktetra ibaji Aor ajak asoshi nümadangtsü mapa ka asütsü amai bilemer. Iba denji ano tangar osangkaket ajak dang nungi Aor osangkaket nungsa tapak teimba, anungji osangtsüsanga teimba aser tekaraba agütsütetra, iba tenüngji osangkaket adokertem kija masü saka asen kin asoshi takok ka asütsü ta bilemer. Atangji, iba amaji temulung ronga bilemaka meinyaktetba aser madoktetbaji rongsen aser nübo nung tsükdakba ajanga meinyaktetter. Osangkaket ka color nung adoktsü asoshi sen aika nüngdaker aser ano tapak teimba akümtsü asoshi nübo tajung aika nüngdaker. Item nüngdakji memenui Tsüngremi moatsütsü tamang teimla lir.  Atangji, meimchir nüngdak aser taginübaji kodanga tatem maka sakasa akok tashi onoki tazüngertem temulung südaktsütsü merangtsü. Mapasa rongnunga anogo shi osangkaket adoktsüba mapa ya tasakba asütsü südi ta bilemer saka jangratemtsüka lir. Ibai anogo shia nübor meyirijang aika nem soruchioka chiyongdaktsütsü mapa ka agizük amai lir, anungji soruchiokji tajung asütsüla. Iba mapa yabo senotsü tajangzük bilema inyaktsüba mapa masü saka nübortem nem metetdaktsünüba aser angatetdaktsünüba tejangraba aser tangatetba agi inyaktsüba mapa ka lir. Iba tejangraba aser tangatetba tanüla  jagi amoi maoa inyakyonga aremer, kinunger aser medemertem den külemi pelatepa mesenzü aremer, benjongbentsü nung maden aremer aser adianu kinunger shirangyonga mesüra asüama atalokyonga mapabo methitemi inyaker. Item timtem aser taremzük ajakji kodang  anepdang shia nübortemi onoki bendena renemtsüba osang azünger idangji amadoker aser pelar. Ano, kodang tazüngertemi temoatsü anguba lemsateper idangjisa tepelaba aser jangratatemba inyaker. Tashi tasenji idangji angur. Iba tashi, temoatsü aser teyariji tazüngertem nungi maneni aginür.