Asenok kümzüka alitsü atema sepaitemi timtem ajurur: PM Modi

New Delhi, October 30 (Agencies): Ita shia Ato kilonser, Narendra Modi-i radio ajanga linük nüburtem den jembiba, 25buba ‘Mann Ki Baat’ nung linük sepaitemi tenla agütsüba atema pai tenüngsang agütsüogo.
Linük nung yimjung aser security alibaji sepaitem ajanga lir ta shia Modi-i, Diwali benjung amongdang nübur ajaki tasütait sepaitem bilemtettsüla, ta metetdaktsü.
Ato kilonser Modi-i, “Tawa tatalokbatem nungi asen linük kümzüka ayutsü atema asen sepaitemi parnok akaba ajak tenlar. Parnoki bendanga inyakba ajanga ni pelar. Iba Diwali ya asen sepaitem nüngtem nung mongdi,” ta ayongzük.
Mann Ki Baat sentong nungsa pai, “Asen sepaitem ajanga linük senso ajak nüma atanger,” ta ashi.
‘#Sandesh2Soldiers’ hashtag ya nisung aikati amshir ta shia pai, “Sandesh2Soldiers campaign nung shilem agitsü atema ni nisung ajak ayongzük, aser telangzüba tajung anguba atema pelar. Kaketshirtem nungi tenzüker yimtaklirtem tashi aser shishilembartem nungi tenzüker yimtenren lenirtem aser saisapongertem ajaki asen sepaitem den Diwali salem osang lemsatepogo,” ta ashi.
Asen sepaitem Himalayas nung sükseta lir aser airports nükdar, ta shia Man Ki Bhat sentong nung minute 30 shi jembidang pai, “Asenok kümzüka alitsü atema asen sepaitemi timtem ajurur. Kar lisem lima nung, kar Himalaya tenem nung, kar Industrial tesem nung aser kari asen airports nüka kümzükdar. Ajaki pei khuret angateta inyakdar. Benjung mapang asenoki parnok bilemtetra, parnoki tashi tasen angutsü. Sandesh2Soldiers nung shilem agiba asoshi pelar,” ta ashi.
Tanü Ato kilonser, Modi-i Himachal Pradesh nung China den arrtsülen sepaitem den külemi Diwali benjung mongogo. Pai Sumdoh nung Indo-Tibetan Border Police (ITBP) sepaitem, Dogra Scouts aser Army tem ajurua sepaitem den nalong lemsatepa Diwali among.
Ketdangsertem osang ajanga ashiba agi, Ato kilonser tanü 11:00 ako meta atong aser Sumdoh o Chango na nung ghonda asem shi sepaitem den among.