Asenok Naga nungertem ya Africa len nungi aru

Dimapur, December 14 (TYO) : Asenok Naga nunger kin shia pei pei poktetba otsü tapu balala lir saka itemji adena bushidanga odangra asenoka tangar kintem den külemi Africa len nungi aru ta DNA tendangba ajanga putetter ta Dr.Abraham Lothai metetdaktsü.
Dr.Abraham Lotha ya Naga nungertem rongnung tashitemetetter aser Tsüngrem tenzüker ka lir. Pa ya St.Joseph College, Jakhama nung principal liasü saka tangbo America nung arogo ka nung sannükba mapa inyaker.
Tanü Dimapur Ao Baptist Arogo pur senden alidak Elim hall nung Morung Express teloki ayongzükba sentong ka nung pa dak aketba shi azü agizüka DNA tendangba ajanga metetba agi asenok tetsü tebou ya küm 1,80,000 jakdang Africa lima nungi prokshiba lir, anungji ibaji ano bushiloka jangjanütsüka lir ta metetdaktsü.
DNA tetezü Deoxyribonucleic Acid aser iba ya ajanga nisung ka temang nungi cell agizüka tendang nung pa mesüra la kong nungi jakzüka aru ibaji puteta sayur. Dr.Abraham-i pa dak aliba cell-ji agizüka tendangdaktsüba nungi tetendangertemi putetba shisatsü nung ajemdaker shisalemsatepdang, tang aliba Naga nungertem ya tamasa Africa len nungi South east Asia aser Middle east ajanga aru aser China atong aser China len nungi tsük lu yimyonga aruba tang aliba Nagaland tongtet ta paisa ashi. Asenok mezüng tsüraburtem ya Africa nung küm 1,50,000 shi jakdang aso aser ilen nung jagi jakshia aruba asenok kinunger tedi tenu karbo Japan nung lir ta paisa ashi.
Asenok apokba indang tebang agidang jembia arua saka tetibo tebang agi jembiba kija dak nendaker melitettsü, anungji asenok apokdak aser apokba mapang jangjatsübaji kanga tongtibang mapa ka asütsü ta paisa ashi. Dr.Abraham Lotha dak DNA tendanga inyakba mapaji National Geographic Genom Genographic Project ajanga 2005 küm inyakba liasü.
Tanü iba senden nung University nungi tesayur, tazünger, yimozülur aser osangbenertem aika dena liasü.
DNA ajanga asenok asenok lipok bushiba ajanga asenoki ano tali bushiloka aotsü asoshi telangzüba dang nungibo tasüngdangba-ang teimba agütsür, anungji shisashirtemi item shisatsüji temulung agüja jangrabangraa bushitsüla ta Dr.Abrahamisa ashi.