Asenok nüngdak

Alima nung lia aotsü atema asen nüngdak aika lir. Item nüngdaktemji kong nungi angutsü ta asenoki shisabolur. Item nüngdaktemji bushidang asenok kanga anibelemer aser taia menar saka aiben mataloker. Iba ama shisabolu nung asen nüngdak ashidak aser meshidak maka asenok timatemer. Ajisüaka, Laishibai ashir,Tsüngremi Pa akaba yari asenok nüngdak ajak agütsütsü. (Filipi 4:19). Tsüngremi anüng aser alima aser yangji aliba ajak yanglu ta asenoki meteta lir. Aji oda, alima aser anüng nung akaba rongsen ajakji Pa meyong. Asenoki alima nung takartiba Computer agi mapa tapu balala inyaktsüsa yanglutetsang, Microsoft Corporation nung mendenbuba Bill Gates akaba indang meteta lir. Par rongsenji America nunger sen dollar biilion 46.6 dak tali lir. Kenü anogo asen dang Bill Gates-i taküm piyong asen nüngdak ajak agütsütsü ta nangzük ka asünunga, asenok atema koda temoatsü aser anisüngzük süla aser asenok kodaka pelala. Aji oda, asen lima nung, asen yimtak mesüra asen kiyong nung  takar kati asen dang kodangsa asen nüngdak adokdir, asen nüngdak ajak pari agütsütsü ta nangzük nunga koda tepelatsüka asütsü. Ajisüaka, Tenyar Paul-i Filipi nungertem dang ashiba asen Tsüngremjibo alima nung takartiba Bill Gates akaba den medemdangtsü makok . Paji asen Tsüngrem. Kotakji Pa menden aser alimaji Pa tetsüng ajemetdak. Asen Tsüngremji  Bill Gates ama akaba den atishiteptsüla Tsüngrem masü. Bill Gates akabaji Tsüngrem tsüngdang kanga ilara asütsü aser Tsüngrem akabaji asenok atema tesüngmangtsü. Iba ama alima aser anüng ajak madak kibur aser takar Tsüngremi pa  akaba yari asenok nüngdak ajak agütsütsü ta nangzüka lir ser nung, asenok nüngdak menguteti timatemtsübaji asenoka shiba asütsü ta asenok nüngdak matalokdang bilemdangtsübaji kanga tim asütsü. Asen Tsüngremi asenok senotsü nüngdakbaji meteta lir. Asenok chirnurtem nüngdakji Pai meteta lir. Asenok kibong nüngdakji asenoki Pa dang masüngdangdangyongi Pai meteta lir. Asenok taneptsü nüngdakbajia Pai meteta dang lir. Ajisüaka, kenken asenoki asen nüngdaktemji mengutettsü ama shisabolur. Idangji asenok teimla samar aser mashilen nungi asenoki asen nüngdak abensadaktsütsü meranger. Ajisüaka, Laishibaisa ashir, asenoki memeshidangyongi, Tsüngremi asenok kechisa nüngdaker, item ajakji meteta dang lir.(Mathi 6:8). Aji oda, meshiang aser aji nenok nem agütsütsü ta nangzükba Tsüngremji asenoki amangba Tsüngrem ya lir. Ajisüaka, asenoki asenok aginüba o asenok nüngdakba na bendangtettsüla. Tsüngremi asenok aginüba ajak agütsütsü tabo menangzük saka asenok nüngdak ajak Pa akaba yari agütsütsü ta ashir. Aji oda, aiben asenoki asen nüngdak masü saka aseni aginüba apia meshia alitsüa akok.  Ashiko asenok nüngdakbajibo tetsüng-teben tajung asütsüa akok ser nung asenoki gari meshira, ashiko ibajibo mangutsüa akok aser anguyonga jangratemabo mamshitettsüa akok. Yakobi ashi ama, asenoki aiben asenok nüngdak nung amshitsü asoshi masü saka asen shi azü jangratem nung amshitsü atema meshir. Ashiko, iba jagi asenoki Tsüngrem dang nüngdaka meshibaji magütsür asütsüa akok. Asenoki amangba Tsüngrem ya kiburtem madak kibur aser tsüngremtem madak Tsüngrem, Pasa takaba, tuluba aser tematiba. Pa alema shinga mali aser Pa makatsü kecha maka. Aji oda, asenok ya iba Tsüngrem chirtemji lir. Tetezü asenok ya chuba chir aser takar chir. Ajisüaka, asenok aika takar chir memesük kanga okrongseta alir aser chuba chir memesük tangar lar kümer meshimetsüa dang lir. Aji oda, kechiba asen nüngdak mengutettsüsa asenok alir, ibaji asenokia kenkenbo bilemdanger asü. Atangji, Pai asen nüngdak ajak meteta lir aser item ajakji asen takarsang Tsüngremi Pa akaba yari agütsütsü. Asenok mapa ajunga agi, Pa dak amangtsü aser asen nüngdakbo ajak Pai agütsütsü. Tanü asenok atema osangtajungji ibaji asütsü.