Asenok o parnok na !

Ajaki Tsüngrem lir ta amanger, anungji parnok Hindu nungertema aser asenok Khristan purtema ajak Tsüngrem dak amangertem lir saka Tsüngrem tenüngang balala, anungji tamangba yimsü aser tekülemba yimya balala nung külemer. Atangji, parnoki süngyanglu külemer saka asenokibo manguba Tsüngrem ka tamang agi külemer. Ibayongji, asenoki parnokji tasü tsüngrem külemertem ta jembir, kechiyong süngyangluji taküm masü saka asenokbo tenük agi menguaka taküm Tsüngrem külemer ta asenoki amanger. Tetsüngdaji ibaji lir. Ajisüaka, tasü tsüngrem külemer o taküm Tsüngrem külemertem na tsüngda tamangba jenjang aser tekülemba yimya reprangdangra, taküm Tsüngrem külemertem dang nungibo tasü tsüngrem külemertemiang tsüngremji tetsübuba tsübua tamang tulu agi külemer. Parnokibo anepdang parnok tsüngremji mekülemibo mapa metenzüker aser techiyonga mechiyonger. Kidang tangar tongtibang nisung arua liaka parnok tekülemba mapangjibo kenyongi meraksai teronem menemba liangmesen ronga külemmatsü. Ibaji dang masü saka parnoki parnok tsüngrem dang taidok aser temoatsü meshia küm nung aiben lumir. Yimten nunga tamasa tekülemdak oagi putir matsüngdang külemküja sür külen dang mapa tenzüktsü. Tang ama election mapanga reprangdangang, election nung tokteper Hindu nunger ajak tamasa temeshi yimti ka nung parnok tekülemdak oagi külemküja sür külenang nüboyim sentong tenzüktsü. Taoba election nung Narendra Modi Varanasi parliamentary constituency nungi toktepbaji tanga kecha agia masü saka iba yimtiji parnok asoshi temeshi yimti lir. Iba amaji parnokibo anepdang aonung shia pei kidang tekülemdak yanglua yur parnok tsüngrem mamadoki külemer. Parnok denji asenok tamang medemdangra asenokbo tamangera memesük. Ashiko, asenok aikati anogo nung khena sarasadem mesüia süidakja alitsüa akok. Talisa, tang ama election mapang asenok Naga nunger candidate-temi tenla ki bushia oagi sarasadem mapang agir külenang nübo yim tenzükba candidate aikabo malitsü südi. Tebilemdangtsü kaji, yakanü Nagaland Baptist Church Council ajanga sarasadem mapang agitsü asoshi candidate ajak jatep saka Independent candidate dak alaka party tenüng amer aierbo kata maru ta asüba osangji asütsü. Aiben yimten lenirtemi arogo lenirtem aitsüba aser arogo lenirtem dang nungi imlaba o jembiba angashir. Ajisüaka, bushia aotsü melen arogoi sarasademtsütsü ajadanga moura arogo lenirtemia yimten lenirtemi bilemba ama meinyaktettsü, Ashiko, asenokibo election nung tashiyim amshitsü aser ochimashi mapatem meinyakra takok mangutsü, anungji itemji sadema inyaktsü atema sarasademtsüa nüngdak mali ta bilema alitsüa akok. Ibayongji, asenokibo election-ibo nisung tamajungertem dang aitsüla ta jembir. Iba jagi Tsüngrem metetter aser teti sentepi oa arogo mapa nung shilem tajung agirbo election-i maitsüla ta asenoki bilemer. Tetetzü, asenoki parliament aser assemly nung amener yimsüsürtem ajak ya Tsüngrem memetetyonga aser mazüngmashiyonga tashiyim  amshitetba aser ochimashi  mapa kecha marendaki inyaktetba aser tenük amur ozüng mali ama inyakba nisungtem asütsüla ta bilemer. Asenok o parnok na tetsüngdaji yangjia tuluka angur. Hindu nungertem asoshibo yimten yimsüsür asütsübaji parnok tsüngrem metetba aser tamang nung takang nisungang bushir. Ibayongji, UP Chief minister Yogi Adityanath ama nisung shimer. Yogi tetezü putir. Ano putir masürtemia mapa metenzükdang tamasa putir bushia külemküja sür külenang mapa tenzüker. Ashiko, iba jagi asenok ama Khristan temejai yimsü asüba state aser government dangbo Hindu nungertemi yimsü asüba state aser government tajungba südi. Parnok tsüngremji tasü tsüngrem saka parnokibo kanga tsübua külemer, anungji mapa ajak shitak inyaktsü meranger. Asenok Tsüngrembo taküm Tsüngrem saka asenoki metsübur, anungji tamajung inyaktsü marendaker. Asenok o parnok na tsüngda tepilaji aji ka asütsü. Item ajakji taküm Tsüngremi ngudagi. Asenok kanga kümdangdi aser mapa ajak nung Tsüngrem kanga tsübua inyakdi.