Asenok shilem

Aiben asenoki asen lima tajungba küma renloktsü asoshi inyakba mapatem ya government kijai inyaktsüba mapatem ama to dang bilemer, iba jagi asenoki yarisemtsü melen taitsü dang aija amonger. Ajisüaka, kidang ki mapa ajak tsüraburtem nem dang nungloka medoktsüi kinungertem rongnung yaritepa inyakba ama, alima renloktsü asoshi inyakba mapa nunga senso shiai pei shilem meteta inyaktsübaji kanga tongtibang asütsü. Aji oda, mapang shia government-i lenmang yanglur saka ita asem pezüka tsüngda lenmangji raksaa aoer. Ibaji lenmang yanglurtemi mejungi yangluba kija agibo masü saka lenmang yangludang asenoki junga merepranger aser lenmang yanglurtem den yariteptsü melen asenoki aiben mapa teinyakdak nunga timtem agüja senzür. Lendi lenmang yangluba yabo kibong ka kisüng jajatsü yanglur masü saka yimkong jajatsü yanglur, anungji lenmang yangluba mapa nung khuret bena reprangtsübaji minister aser engineer-tem mapa dang masü saka senso shia mapa lir, kechiyong lenmangji senso lenmang, anungji senso shiai pei lenmang yanglur ama bilema lenmang yanglurtem mapa nung timtem majurui mapa shitak renemtettsüsa yariteptsüla. Lenmang yangluzüker külena senso ka asoshi lenmang repranga anepalutsübaji aji tatem masü saka lenmang meraksadaktsüi anepalutsübaji senso ka asoshi anogo shia mapa asütsü. Lenmang melamelaa raksaba timtem kuli kaji kilentzü junga mayur, anungji tzünglu arudang motzü lenmang lendi nung ayimer, iba jagi lenmang arr mashir. Asenok dak aketba yimya tamajung kaji, iba amaji lenmang raksaa lendi nung motzü ayimyonga odang toktsür, kechiyong ibaji asenok mapa masü department mapaa ta asenoki bilemer. Atangji, ibaji department mapa saka department-ia merepranger, idangji lenmangbo repranga lia raksar aser nübortembo nübortemsa timatemer. Iba ama tensa ka nung, kilentsü yapoka motzü shitak yimdaktsütsübaji department mapa süaka lenmangji asen lenmang amato bilema asenoki kilentsüji tua yutsüra mesüra yapoka toktsüra, iba jagi lenmang meraksai talangka alitsü. Iba amaji kodang asenoki government-i inyaktsüba mapa nunga mulungsua angati shilem agidir, idangji asenok dangi asenok temeten tasü itta jembitettsüsa tashi ka pasasa arutsü. Asenoki mapa maden asen temeten kija jembiba agi tangari asenok o reta magir dang ashi, kodang asenoki asen shilem meteta khuret bendir, idangjibo government nung alirtemia asenoki ashiba o ji retreta agitsü. Iba amaji yimdong aser office merüka ayuba mapa tashi nung asenoki kaket teshisa tilakata yimdong nung mashimashi meindoki janaona endokdak bushia oa endokra aser sali metsüa mashimashi nung memetsüi metsü metsüdak metsüra, ano metsümeshidak shitak bushia orr metsümeshir külen tzü agi aseni menenba tashi jungjunga shitoker toktsüra, iba jagi asen lima renlokba nung tuluka yaritsü. Senso shibai pei yimti yimdong janatsütsü apayur aser nübortem mapa inyakdak office aser metsümeshidak dena merüka ayutsü meranger, pa mesüra la shisatsü nung pei lima meimba shisatsü lir ta angatetdi. Iba kasaji asenoki aiben light tashi agi meperiba indang jembir saka asenoki nüngdak makaba nung light tsükdoktsübo mapayur. Iba amaji mesüi asenoki asen lima nung light agi mepriba meteta light apayua tsükra aser talisa light auyaa atsükba ochimashi mapa nungi pilara, iba kisüng jagi asen lima nung nisung ajak pei nüngdakbo peritsüsa light agitettsü aser light agütsüdak Power House nunga timtem madoktsü. Iba amaji tzü dena apayua agitsübaji senso ka mapa asütsüla. Pei ki anasa mesüra pei kiyong nung lenmang tera raksaa alidang, light yindong mejungi küma oa alidang mesüra tzü pipe raksar angudang, jet ta peisasa mulungtetter tenla ka ama agüja itemji yanglushitsüra, iba jagi nübortem kanga ajangzüktsü. Atangji, government mapa nung inyakertemi ochishia meinyakba agi aiben nübortem tezü atanger, iba jagi nüngsen dang jembir yutsür. Ajisüaka, ajaki ajak majung indang jembiba mapang, temelenshiji nisung ka nungibosa tenzüktsüla aser iba temelenshi tenzükdak nisungji asen asütsüla.