Asenok takok ya takok masü

Yaseta aliba nisung ka asoshi amtsük telong kajia tsüngrem ta bendanger shin o nung ashi ama, asenok ama makamait aser timtema alirtem atemabo oset tejen ka yanglushitetbaji takok tuluka lir. Aji oda, ayadangbo chisüng tilaka anemba agia anisüngzüker. Ajisüaka, teti chisüng dang bushia yaseta alitsüsa aliba takümji pei taküm jenjang tajungba küma renloka aotsü bilema inyakba nisung masütsü. Iba ama teti yaseta aliba nisung ka taküm jenjang bilemdangtsüsa shisa ka arubaji, Mokokchung town nung transformer raksar ita junga light maruba mapang transformer tejen ka yanglushir amenoktsü merangtepba tiaji liasü. Asen lima nung transformer tasen tuluba tuluba bener arua mapa tuluba tuluba amang-sangwa metitemi inyaktsü melen küm shia transformer raksar, aji melena tejen ka danga ngudi sü ta atatepba tiaji temeimtsüka lir. Iba ama tia nung asenok rongsen bushiba maparen nung renloknüaka merenloktettsü. Aji oda, maka nungji transformer tejen ka melentetbajia asenok asoshibo takok tulu ka angu amai bilemer. Ajisüaka, asenok ajaki asenok kolak angüma lur bilemdangra, asenok takok ya takok masü ta angatettsü. Tanü putu nung amang nung tesangwa atema tsükloktsü asoshi nüngdakba dang nungi asenok business inyaktsü asoshi electric tashi nüngdakba ya kanga agia tuluba lir. Joko, light marura mapa inyakdak (workshop) ka nunga mapa meinyaktettsü, mozü kidang operation magitettsübajibo yutsür tashidaka metendangtettsü, hotel nunga soruchiok mesütettsü, Xerox aser computer typing dokan lapoka alirtembo kecha mapa maka akümtsü, osangbenertema osang meyoktettsü aser computer amshia mapa inyakdak bank aser office-tem nung mapa meinyaktettsü. Aji oda, Mokokchung ama town ka nung kenü light maruba ajanga anguba takoksaji asadangra kanga tulu asütsü. Atangji, transformer raksar memelentet timtemba aser light junga maruba agi mapa meinyaktet takoksa angubaji Mokokcung nung dang masü saka Nagaland ajunga nung lir. Aji oda, light tashi junga manguba agi mapa meinyaktet takoksa angurtem rongnung takoksa tulutiba angurtemjibo Dimapur nung alirtem asütsüa akok. Tanga state nung amato Nagaland nung industry tulu kata lapoka mali saka Dimapur nungang industry tilateri kar lapoka lir. Aji oda, süng aser long arangba industry, kaket menüngba, chiyongtsü yangluba aser mekongdaktsüba mapa ajak light tashi agidang inyaker asünungji light ken maruba ajanga item mapa inyakertemji komaka akoksatsüar aji asenoki temetet dang lir. Dimapur nung iba yimobilem tezüludak nunga light oa adoknungji envertor tashi nung ken inyakerbo diesel enokba generator atemloker inyaker. Light junga maruba agi anguba takoksa aser timtemji itemji lir. Ano, item dang nungi takoksa tulutibaji school tanurtem light maliba ajanga lesson mebushitetba takoksaji asütsü. Item timtem aser takoksa ajuruba ya asenoki majurudangba timtem takoksa masü saka küm shia ajuruba takoksa aser timtem lir. Ajisüaka, kechiba shingaia temulung magütsür ta bilemer. Light tashi yabo tesem ajak nung tuluba tuluba nüngdaktsü, anungji iba nüngdakji apia Power department-i meinyakra kopi melii asen lima nung küm junga light marutsüsa ataloktsü. Idangjibo transformer dang masü saka yinzü ajak rongzüka tsüktsü aser itemji asenoki jet ta memelentettsü. Atangji, tesem kar nungbo light atsüba lenmang tasen tenzüka inyakdagi. Ajisüaka, item mapaji kodanga matemer. Ashiko, teinyaker atemabo mapa matem maneni inyak nung dang tajangzük angutsüa akok saka nübortembo kanga akoksatsü aser alima telongi alutsü. Asen lima nung tanü ama light junga maruba ya power department purtemi temulung agüja meinyakba kisüng agi masü saka nübortemia temulung magütsür. Tanü asüngbo ketdangsertem den nüngsen agitepba aser asen mapa bolua aiben mejajayonga RTI ozüng amshia Power department purtemi inyakba aser inyaktsü bilembatem ajak metetnüa sensosangertemi asüngdangra, iba kija jagi asen lima nung asenok nüngdak peria light tashi angutsüsa state sorkari sen peria endoktsü aser ketdangsertemi shitak inyaktsü.