Asenok tan asütsüba mapang

Tang ya Nagaland tesem aika nung anentsü agi lenmang aser apu raksatsür nübortem kanga timtem tia nung lir. Item rongnungji Kiphire aser Meluri len alirtemsa timtatemba asütsü. Atangji, Kohima, Dimapur aser Mokokchung nung alirtema aika kiojen raksar aser tzü agi atsüngbanger kanga timtemdagi saka item ajak rongnung ano Kiphire district nung alirtemsa timtatembatemdagi. Joko parnok jajaba lenmang National Highway 202 nembanga anentsü alur ita ajunger aser tang tashi lenmangji melapoktetter, anungji anentsüji ajanga jangotsü peii akok tekolak nung bener tetsüng agi tsüremseta ajanga süir. Ibayongji, jangotsü nung jenjang kaketa tur meshir aser manemtsünemertem mozü ki tajung bushia moutet aika timtemdagi. Kiphire-leni aoba lenmang ya state highway danga masü National Highway, saka anentsü agi lenmang anembanger ita junga nung melapoktetbaji asenok asoshi tamakok tuluka asütsü. Kasa national Highway Delhi aser Jaipur len aliba lenmangtem alima lendongtsüdong agi raksa aser anenzüka alu ta ka asünunga ita junga meyangluteti atatsü asü ta asen lima nung aliba National Highway tia den medemdanga bilemdangtsüsa adoker. Atangji, National Highway süaka sen dang center nungi yoker dang ashi lenmang repranga anepalutsübaji state government khuret lir, anungji anentsü meyadoktetbajia asenok tamakok asütsü. Iba ama timtem lendong ajuruba mapang government-i anentsüa meyatoktet nübortem takoksa ajuruba ya asenok asoshi shisabulutsü tuluka lir. Tangbo meyi mapang tsünglu aruba agi anentsü aluba dang saka tanga lima nung ama menoknok tulu anoka kiojen aika chirep, lenmang aser apu aika anenzüka ao, electric yindong aika lao aser yinzü tokdangba ajanga light mali aküm ta asüba alima lendong asen lima nung ajurura koma asütsü ta kanga shisabolua aiter. Tang anentsü tatsüka aluba meyadoktet nung iba ama alima lendong tulu ajurunungbo asenoki asenoksasabo mekümzüktettsü. Lenmang lapoka electric light arudaktsütsüba mapajibo yutsür kiojen chirepba agi nisungtem nembanga aliba purtem magitettet asenok jepa kazütsüsa akümtsü. Iba amaji ataloktsü tsübuba agi matalokdaktsütsü asoshi pibo senotsü shitak amshia lenmang aser apu shitak yanglua anogo shia anepalur aser ajungben lendong mapang nung yariteptsü asoshi teinyakertem aser nüngdakba osettem shitak renema ayur. Iba denji nübortemia peisasa alima lendong mapang lendong nungi kümzüktsüsa kiojen aser lenmang yangluba mapatem nung government-i ashi angaa yanglur. Iba denji asen lima nung asen government aser asenoki inyakba mapatem medemdanga bilemdangra, asenokbo asenoki yangluba apu, lenmang aser kiojen ajak ya asenoksasa asenok asütsü sang yanglur amai yanglur. Apu yanglu nung jenjang tezübaba apia yin alitsü, lenmang nung jenjang tezübaba apia long alatsü aser kiojen yanglu nung jenjang tezübaba agi yin, lisem aser cement alia yanglutsütsü. Ali ya asenokisa taginüba, anungji kitsükirong dang fire brigade pur gari dena mesenzütettsüsa lenmang lendi ajak atsüngbanga agitsü. Ibajibo Naga nungersa rongnunga asen nisungsa morumoru tasüba ama tesem aika nung angutsü. Iba amai lia menoknok anok nungbo asenok yaritsüsabo shinga marutsü, kechiyong department nung alisang aser alila timtemang tuluba asütsüsa ataloktsü. Joko, asenoka nüchi küma arua nisung mesüka ali meshiogo.Tang ama alima lendongtsüdong atalokba mapang ita junga nübortem meyaritetba jenjang ya asenok asoshi tansütsü mapa aser mapang ka asütsü. Iba nung ya aoksar, tang nungi danga asenoki ochimashi tilaka inyakba ajanga asenoksasa asenok alima lendong nungi mekümzüktettsüsa asenoki meinyakli. Apu ka mejungi yanglutsür asen tajangzük tulu agibaji, lenmang mesüra kiojen mashimashi yanglutsür asen tera takar akümbaji aser lenmang lendi tatsüka atsünga agiba agi asen kima tera sadema akümbaji nüchi mapa masü yiar mapatem lir. Item jagi lendong madak lendong bener arutsütsü.