Asenok tangatetba ilara

India telongjem kübok state ajak nung Deobar anogo ya office mapa inyakba anogo asütsü ta center government-i ozüngsa sangdong ka asünunga Nagaland government-ibo ola madoki anidaktsü südi ta shisabolua bilemer. Ashiko, yamaji ka sangdong nunga Mizoram aser Meghalaya government-ibo idangjisa parnokibo iba ozüng nungji manidaktettsü, kechiyong parnokbo Khristan, anungji Deobar nübo sentepi aotsü aser anisüngzüka amongtsü, anungji iba ozüngji meyipa reprangshitsüla ta takangba agütsütsü. Iba sülenji hopta anasemka lir külen meilongi Nagaland government-ia kasa tebilembaji center government nung alirtem mulung meyirutsüsa tanemi metetdaktsütsüa akok mesüra ola madoki deobar temoatsü sentep mapangang anepdang yakta office-i maodang lidi ta arogo dang asüngdangtsüa akok. Iba tebilembaji pelashishia arogoi agizük ka asünunga Naga nunger Khrsitan purtem asoshi kecha tesüngmangtsü mali, kechiyong government-i arogo aser mungdang nüngdak inyaktsüra iba jagi teperi. Tanü Naga nunger yimsüsür aser amangba purtem tangatetba aser tamang jenjangji yangji lir. Ibayongji, center government-i Christmas anogo memongi Good Governance Day amongyonga asenok asoshi tajung amai dang bilemer, Good Friday nung Digital India anogo amongyonga kecha masü, anungji Easter Sunday nung office-i aotsübajia asenok asoshibo kecha balaka masütsü. Iba tangatetba aliba jagi tang linük nung nashi metepsettsü asoshi ozüng yangluaka asenok Naga nunger yimsüsür aser arogo nungertembo nashi shia machir amato ola madoker. Pi tangar tangatetba reprangdangra, Meghalaya nungbo nashi metepsetdaktsütsü ozüng yangluba anema BJP züngsem aika BJP telok nungi anenogo aser Kerala nungbo rongdak tatar senden jatepa nashi shi mayonga süngo jemer külenang senden tenzüka ken o lemteper külen, nashi metepsettsü ozüng yangluba kanga sashia aitsü aser iba ozüngji agientsüla ta pangzüng takang ka renema metetdaktsüogo. Asenoki achiba shi rongnung Laishiba nung Tsüngremi achitsü melaba shibo nashi shi ya dang lir. Shitakba agibo ak shi ya Muslim nungertemi dang masü saka Khristan purtemia machitsüla. Ajisüaka, asenokibo tanguba aser techinüba ajak achir asünungji Tsüngremi asenok nembo taochi balaka agüja alitsü ta amanger. Tanü asenok Naga nungertem akhi Naga nunger memesük küma aobaji asenoki angatetba ajunga agi sen aser yimten nung ‘Ruling party’ angatetba ya asütsü. Akhi Naga nungertemibo chi mechiyongi arem nung süngolemba mejaka yimten nüchiso asoshi timtem arem aser Naga yimten temeten asoshi election magia arem. Tanübo Naga nunger asoshi Naga yimten temetena mali aser Naga nungeri amangba Tsüngrema mali ama, oagi Delhi nung kechi teloki yimsü asür aser center nungi sen peria angutsü asü mangutsü ta asüba tangatetba sülen dang Naga nunger ajak anidaker. Ibayongji, Naga nunger aküm maket kümogo. Iba tia nungbo Naga nunger ajak oagi center nung yimsüsüba telok (Ruling party) nung adenyonga tangari kiküm adena maidaktsütsü. Alima nung shiba südir süang mesüra koba kin südir süang senotsü agi masü saka aküm agi taküm junga alir. Iba akümji tangatetba nung indangindanga nokdakba ajanga arur. Sen kisüng agi alima ajunger asübo Nagaland topur junga yanglur lila aser Ruling Party nung adenba agi tebilemtsü akoker asübo Naga yimten tebilemtsüa koker lila. Ibaji Naga nungertemi angatet meshiiogo.