Asenok telongjem

Naga nunger rongnung kin shia pei kin poktetba otsü balala asütsüa akok aser kin shia oshia balala jembia alitsüa akok, saka parnok ajakji Naga nunger lir. Anungji, tanü Naga nunger ta asüba kintem rongnung kari danga onokbo Naga nunger masü ta meshitetra, Naga nunger ta asüba kin ajakji kinunger aser adianutem dang lir. Anungji, Naga nunger ta asüba kintem ya nübener kibong ka dang mesük. Atangji, nübener kibong nung teti tepela aser tesünep nung dang alitsü ta masü, khenkhenbo mangatettep aser mepelatepa adoktsü, rarateptsü aser jashiteptsüa akok. Ajisüaka, nübener kinungertem rongnungsa kati mesüra anati tiyongtsü nung  o tajung jembia yimjung yanglutsür aser tangatettep kati arudaktsür, anungji ano tanaben pelatepa alir. Iba kasaji Naga nunger kintem rongnung sobaliba tsütsü asütsüa akok mesüra ali aser tzü tsütsü asütsüa akok, kodangsa mangatettep adokdir Naga nunger adianu kintemi tiyong nung ken o tajung bener oa jembia yimjung yanglutsütsübaji kanga nüngdak kümogo. Alima yimya agi, nisung ana mesüra telok na tsüngda mangatettep adoka raratepra, tena sasabo rara manentettsü mesüra tangatettep kati marutettsü, anungji tena tsüngda rara bendangtsür aser yimjung o jembitsür kar nüngdaker. Aji oda, mangatettep aser rara liaka, tiyong nung yimjung yanglutsür aliba agi nisungtem putepa litetter. Iba kasaji tanü Naga nungertem rongnung kin ajaki kati ka taoba ta aria bilemtepa benshitsü nüngdaker. Kin o kin na tsüngda asütsüa akok mesüra nisung o nisung na tsüngda asütsüa akok, nübortem tangatettep nung putepa alitsüba yabo ozüng agi mesüra “government order” ka ajanga puteptsü makok, saka kati ka nem yimli aser taidok agütsütepa peisasa tangatettep kati arutet nung dang putepa litettsü. Tanü Nagaland anüdoklen kin o kin na meputeptetba ajanga jubilee dena memongtettsüsa atalokba tensa tia ya parnok asoshi dang masü saka Naga nunger ajak asoshi tebilemtsü khuret tuluka asütsü. Iba tensa tia süneptsütsü asoshi Nagaland sorkari merangdangdagi saka makoker, kechiyong sorkari ashibaji nübortemi manger. Aji oda, kodang sorkari ashiba nübortemi mangalir lendong ataloktsü ana nung lir. Iba ama tensa mapang ka atalokdang, Naga nunger tangar kintemi kechi bilema repranger (?) ta asübaji asenok ajak asoshi tongtibang asütsü. Parnokji maneni meputepi lidaktsüner asü ? Mesüra kari kin ka aser kari kin ta pu semteper asü ? Iba ama mapang nung asenok arogo telongjem toa kong ali ? Lokti tentet telongjemtem toa kong ali (?) ta tebushinütsüka ! Arogo telongjem aser mungdang ya yimjung aliba mapang dang yimjung o jembia sarasadema amongtsüba asü ? Lokti tentettema yimjung mapang nung dang lokti senden ayongzüka yimjung aser telongjem indang jembia amongtsüba asü ? Arogo telongjemji meputep alidak aser mangatettep adokdak nüngdaker aser lokti tentet telongjemjia kin o kin na tsüngda mesüra nübortem rongnung meputep adoka tsükchitep dang tiyong nung o tajung shia yimjung yanglutsütsü nüngdaker. Naga nunger kin o kin na tsüngda raraba mebendangtsütetra asenok arogo aser lokti tentet tamakok tulutibaji aji asütsü. Aji oda, tanü yimtsüng o yimtsüng na asütsü akok mesüra kin o kin na asütsüa akok, kongsa parnok meputepba ajanga ajak timatemtsüsa aser akoksatsüsa angur, item tensa tia tamajungji repranga dang melii arogo aser lokti tentet telongjemi tiyongtsü nung yimjung o bener oa putepdaktsütsü merangtsüla. Asenoki mapaa temela dang inyakner, yamaji ken o a temela nung tebang inür, saka arogo aser lokti telongjem tentetbaji mapa temela-temela shima inyaktsü asoshi tentetba masü saka tensa tajung majung ajak nung nübortem telongjem aser tangatettep meraksai longjema alitsü tentetba telongjem lir. Aji oda, tanü ama yimtsüng o yimtsüng na mesüra kin o kin na tsüngda mangatettep adoka shisabolutepba mapang arogo aser lokti tentet telongjemi ola madokra item telongjemjibo  maliang tajungba asütsü.